Minister mag nét Mercedesse huur
2011-12-09 08:00
Kaapstad. – Die departement van gesondheid het sowat R95 000 bestee om tussen Maart 2010 en Julie 2011 motors vir dr. Aaron Motsoaledi te huur.
Dít blyk uit ’n geskrewe parlementêre antwoord van Motsoaledi, minister van gesondheid.
Die R95 000 is bestee in onder meer KwaZulu-Natal, Limpopo, Bloemfontein en die Oos-Kaap.
Motsoaledi het gesê die departement beperk hom tot die huur van Mercedes-Benze (C180’s en C200’s).
In die betrokke tydperk is motors 21 keer gehuur.
Dit sluit die huur van motors vir dr. Gwen Ramakgopa, sy adjunk, uit.
Die minister het gereageer op ’n vraag van Ian Ollis, DA-LP, wat wou weet hoeveel keer motors gehuur is om Motsoaledi en Ramakgopa te vervoer, asook wat die koste, die redes en die model was.
Motsoaledi het gesê by tye het die koste meer as R13 000 per geleentheid beloop en ’n ander keer was dit meer as R11 600.
Die departement het R13 290 betaal vir die huur van ’n motor toe Motsoaledi, die dekane van mediese fakulteite en die Nasionale Gesondheidsraad in Julie verlede jaar in Durban vergader het.
In April vanjaar het die minister die Umkhanyakude-kliniek geopen en belastingbetalers het R11 636 vir ’n Mercedes-Benz opgedok.
Ollis het in sy reaksie ge- sê die DA is baie bekommerd oor die tendens dat ministers gereeld motors huur.
“In sommige gevalle blyk dit ook dat die verhuringskoste aan die regering meer is as aan die algemene publiek.
“Dit kan neerkom op vermorste uitgawes of dalk selfs korrupsie.”
In sommige gevalle word motors gehuur om ministers na hul kiesafdelings te neem om partypolitieke werk te verrig en nie amptelike regeringswerk nie.
“Dit is onaanvaarbaar,” het Ollis gesê.
– Volg Nuus24 op Twitter
- Beeld