Minister 'glo aan vrye media'
2010-11-12 07:22
Johannesburg - Hy steun ’n vrye media, het Roy Padayachie, nuwe minister van kommunikasie, Donderdag op sy eerste nuuskonferensie gesê.
Hy en Obed Bapela, adjunkminister, “glo aan die beginsels van die vryheid van die media. Ons verseker die media dat ons altyd hul reg sal respekteer om op ’n oop en deursigtige manier gesprek te kan voer.
“Dit is ons siening dat die media ’n kritiese mag in die ontwikkeling van die samelewing is.”
Die media het volgens Padayachie “’n positiewe en leidende rol te speel in die opvoeding van die breë publiek oor die belangrikheid van inligting- en kommunikasietegnologie vir die bevordering van die samelewing se doelwitte en die daarstelling van ’n beter lewe vir ons mense”.
Die minister het ’n ingrypingsplan aangekondig om die departement van kommunikasie te verbeter. Dit bestaan uit drie dele:
- Die “heropbou” van die departement deur onder meer alle vakante poste binne ses maande te vul en ’n nuwe direkteur-generaal aan te stel;
- Die “stabilisering” van die departement se openbare instellings, soos die SAUK en Sentech; en
- Die sluiting van vennootskappe met die private sektor.
Padayachie het ook gesê sy departement wil die plaaslike telekommunikasienetwerk oor ’n jaar ontknoop. Dit verwys na die netwerk wat verbruikerspunte met sentrales verbind.
Binne die volgende paar jaar is die verbruiker veronderstel om dit te besit sodat hy self sy diensverskaffer (soos Telkom of Neotel) kan kies.
- Die Burger