Minister dreig wanbetalers met hof
2010-03-13 09:19
Lizel Steenkamp, Die Burger.
Kaapstad - Sicelo Shiceka, minister van samewerkende regering en tradisionele sake, sal wit én swart inwoners wat teen swak dienslewering protesteer met die howe en polisie aanvat.
Shiceka het gister in ’n onderhoud gesê hy het ’n “oorlogkamer” in sy departement wat wit wanbetalers “met hul eie geld” in die hof sal beveg. Voorts sal swart inwoners wat dreig om die Wêreldbekersokker met geweld te ontwrig, met die polisie te doen kry.
“Die veiligheidsmagte kan enigiets doen. Dis ongewapende protesteerders. Dis maklik. Niemand gaan 2010 ontwrig nie.”
Volgens Shiceka is die meeste betogers “dronk” en maak drank hulle “sterk”. “Ek het met die minister (van polisie) gepraat: As mense eiendom brand, gaan ons die township seël en die misdadigers soek.”
Shiceka het die onderhoud toegestaan ná die nasionale belastingbetalersunie (NBU) se ope brief oor sy aantyging dat hulle munisipaliteite ondermyn en onwettige parallelle regerings vorm.
Inwoners van sowat 300 dorpe weerhou hul belasting en dienstegeld onder leiding van die NBU. Die geld word in afsonderlike rekenings betaal om dienste reg te ruk.
“Dis die einste mense wat sê die ANC-regering en sy leiers respekteer nie die Grondwet nie. Maar respekteer hulle die Grondwet as hulle onwettige besluite neem en verkose regerings ondermyn?” wou Shiceka weet.
Volgens hom het niemand dié mense verkies om plaaslike regerings oor te neem nie. “As ons parallelle regerings toelaat, sal Suid-Afrika ’n piesangrepubliek word. Jy kan nie buite die regering optree en jouself as ’n held voordoen nie.”
Shiceka het toegegee dienslewering is swak weens ’n tekort aan geld en “omdat ons mense aangestel het wat nie weet wat hulle doen nie”.
Hy gaan in April met die wit wanbetalers vergader om ’n vreedsame oplossing te vind. “Die wittes wat sit en kla oor die onbevoegde swart regering, moet hul vaardighede en geld wat hulle tydens apartheid bekom het, saambring. Die bevoegdes en onbevoegdes moet saamwerk.”
Shiceka wil met sy omkeerstrategie vir munisipaliteite beter samewerking tussen wit en swart inwoners bewerkstellig. Teen Desember moet klagtes oor dienslewering binne twee dae aandag kry.
As die minister se onderhandelings met die NBU misluk, gaan hy hof toe. “Ek gaan hulle kop eerste aanvat. Ek gaan hulle met hul eie geld beveg,” het hy gesê.
Die departement sal teen einde April ’n lys van brandpunte landwyd hê.
- Die Burger