R1,4 miljoen vir minister se luukse verblyf
2011-11-02 07:05
Kaapstad – S’bu Ndebele, minister van vervoer, het ’n Johannesburgse hotel verlede jaar R70 000 vir chauffeurdienste betaal en 25 dae daar tuis gegaan.
Ndebele, soos alle ministers in die kabinet, het twee ampswonings en twee ampsmotors, in Pretoria en in Kaapstad, sowel as persoonlike motorbestuurders.
Hy het tussen September en Oktober verlede jaar 25 dae aaneen in die Hyatt Regency-hotel in Johannesburg gewoon. Die totale rekening vir dié tyd, wat die motorgebruik insluit, was R190 000, blyk uit ’n antwoord op ’n parlementêre vraag.
Sy adjunk, Jeremy Cronin, het tussen 1 April 2009 en 31 Julie 2011 altesaam 24 dae op belastingbetalers se onkoste in hotelle oorgebly. Die totale koste daarvan was R74 203.
Luidens die antwoord het Ndebele in dié tyd R1,372 miljoen aan hotelverblyf bestee. Hy het 346 nagte in hotelle deurgebring.
Stuart Farrow, DA-LP, het gesê dit is bykans ’n volle jaar.
“Ons is bekommerd oor die tendens wat ons sien van ministers en hul verblyf in duur hotelle. Die inligting oor Ndebele volg byvoorbeeld baie kort op die hakke van dié van me. Tina Joemat-Pettersson, minister van landbou en visserye. Sy het tussen Junie 2009 en Mei 2011 R1,6 miljoen aan luukse akkommodasie bestee.”
Die ironie dat ’n minister van vervoer ’n chauffeur nodig het om hom rond te karwei, ontgaan hom nie, het Farrow gesê.
Die departement van vervoer is om kommentaar genader, maar het teen druktyd nog nie gereageer nie.
Jimmy Manyi, regeringswoordvoerder, het in reaksie op vrae oor die saak na die ministeriële handboek verwys.
Volgens Farrow gaan die DA die openbare beskermer versoek om die saak te ondersoek.
“Dit is magsmisbruik. So eenvoudig is dit. Wat ministers met hul eie geld doen, traak niemand nie, maar as dit by belastingbetalers se geld kom, moet vrae gevra word. Hierdie geld kon gebruik word om huise vir die armes te bou eerder as om die minister te bederf,” het hy gesê.
– Volg Nuus24 op Twitter
- Die Burger