Minister blaas R1,1 milj op spogmotor
2009-09-02 07:29
Liesl Peyper
Kaapstad - Die minister van hoër onderwys, dr. Blade Nzimande, het soos baie van sy ampsgenote ook ’n spoggerige vuurwa aangeskaf – ’n BMW 750i van meer as R1,1 miljoen.
Dít blyk uit die antwoord wat sy departement gister op ’n parlementêre vraag van die DA verskaf het.
Nzimande het dieselfde model gekies as die twee BMW’s wat vir genl. Siphiwe Nyanda, minister van kommunikasie, aangekoop is. Anders as Nyanda het hy egter geen luukse bykomstighede aangevra nie.
Nyanda moes vroeër deurloop onder kritiek, enersyds omdat hy twee van die peperduur ampsmotors aangeskaf het en andersyds, omdat hy luukse bykomstighede van R150 000 vir dié voertuie aangevra het. Dié aankope het die belastingbetaler altesame R2,4 miljoen uit die sak gejaag.
Intussen het die DA se adjunkhoofsweep, mnr. Mike Ellis, in ’n verklaring gesê sy party het skriftelike vrae aan al 35 departemente gerig om vas te stel of nuwe ampsmotors aangekoop is. Sestien ministers het nog nie antwoorde verskaf nie, insluitende pres. Jacob Zuma.
“Hierdie departemente is óf te ongeorganiseer om vas te stel of voertuie aangekoop is, óf die ministers hoop dat die duur aankope wat aangegaan is ongesiens verby sal gaan.”
Van die antwoorde wat reeds verskaf is, blyk Nyanda se aankope die duurste te wees, gevolg deur die minister van basiese onderwys, Angie Motshekga, met R1,7 miljoen.
Altesame 13 van die ministers wat geantwoord het, het aangedui dat hulle nie nuwe ampsmotors gaan koop nie.
- Die Burger