Minister bestee duisende vir gefuif
2009-10-16 07:31
Liesl Peyper
Kaapstad - Die minister van basiese onderwys, Angie Motshekga, het meer as R250 000 bestee aan ’n partytjie om haar begrotingstoespraak in die parlement te vier.
In antwoord op ’n parlementêre vraag van George Boinamo, DA-woordvoerder vir onderwys, het Motshekga laat blyk dat die departement van onderwys altesaam R267 044 opgedok het vir dié geleentheid.
Ingesluit hierby is nagenoeg R50 000 wat aan verversings bestee is en R20 500 vir vermaak.
Motshekga het egter daarop gewys dat die partytjie, wat deur 250 gaste bygewoon is, vir die departemente van basiese onderwys en dié van hoër onderwys en opleiding gehou is.
Dié partytjie en die minister van polisie, Nathi Mthethwa, se peperduur verblyf in die Table Bay-hotel in die V&A Waterfront (wat R237 000 beloop het), het die belastingbetaler meer as R500 000 gekos.
Motshekga en haar ampsgenoot, dr. Blade Nzimande (minister van hoër onderwys en opleiding), het reeds onder skoot gekom omdat hulle, ondanks die resessie en soos baie ander kabinetsministers, nie geskroom het om weelderige ampsvoertuie aan te skaf nie.
Motshekga se twee voertuie (’n Range Rover Sport TDV8 en ’n BMW 730D) het die belastingbetaler meer as R1,7 miljoen uit die sak gejaag, terwyl Nzimande se BMW 750i meer as R1,1 miljoen gekos het.
- Beeld