Minister, adjunk eis R148 000 vir toelaes
2011-09-28 08:05
Kaapstad. – Dr. Blade Nzimande, minister van hoër onderwys en opleiding, en sy adjunk het in die afgelope boekjaar byna R148 000 aan dagtoelaes van die regering geëis.
Dit kom neer op meer as R12 000 per maand vir Nzimande en dr. Hlengiwe Mkhize, sy adjunkminister.
Annette Steyn, DA-LP, het in ’n parlementêre vraag probeer vasstel presies hoeveel die ministerie van hoër onderwys die departement met dié eise uit die sak gejaag het.
In die departement se antwoord het dit aan die lig gekom dat Nzimande en Mkhize onderskeidelik R105 906 en R41 996 aan dagtoelaes in die tydperk van 1 April 2010 tot 31 Maart 2011 geëis het.
Volgens Gina Gouws, personeelhoof van die departement van hoër onderwys, is werknemers (in dié geval lede van die uitvoerende gesag) geregtig op dagtoelaes wanneer hulle plekke, benewens Kaapstad en Pretoria (waar hulle amspwonings het), in hul werkshoedanigheid besoek.
Dagtoelaes word betaal vir drie maaltye per dag en onvoorsiene uitgawes, soos leesstof en private telefoonoproepe.
“Onthaalkoste en petroleise is nie by die spesiale dagtoelaes ingesluit nie,” het Gouws by navraag gesê.
Nzimande het onlangs opnuut deurgeloop onder kritiek oor sy 15 dae lange verblyf in die Mount Nelson-hotel in 2009.
Die Burger het berig dat die DA hom op adj.pres. Kgalema Motlanthe beroep het om te keer dat ministers agter geheimhouding wegkruip om hul luukse hotelverblyf te verbloem.
Dít volg op Edna Molewa, minister van waterwese en omgewingsake, se volstrekte weiering vroeër om ’n parlementêre vraag te beantwoord oor die hotelle waarin sy gebly het. Volgens haar sou haar veiligheid bedreig word indien sy dié inligting openbaar maak.
– Volg Nuus24 op Twitter
- Die Burger