Minderjariges in hof vir moord
2012-12-20 17:02
Johannesburg – Ses tieners wat daarvan beskuldig word dat hulle drie ander kinders in Mookgopong, Limpopo, vermoor het, het Donderdag in dié dorp se landdroshof verskyn, het die polisie gesê.
Die saak is tot 3 Januarie 2013 uitgestel, het brig. Hangwane Mulaudzi gesê.
Die jeugdiges gaan na 'n plek van veiligheid geneem word.
Die ses, tussen die ouderdomme van 12 en 14, word daarvan beskuldig dat hulle die twee broers Bafana Kekana (9) en Hosea Richard Kekana (10) asook hul niggie Johana Kekana (12) op 18 Augustus in Mokgopong, voorheen Naboomspruit, vermoor het.
'n Verbyganger het naby die Constantia-oord op hul lyke afgekom.
Hulle is met klippe doodgegooi. Bebloede klippe, wat met 'n kombers en boomtakke toegemaak is, is naby hul lyke gevind.
Die kinders het nog hul skooluniforms aangehad. Hul hande en voete was met veters vasgebind.
Die meisie, Johana, is eers verkrag voordat sy doodgemaak is.
Hulle was laas op 15 Augustus gesien tydens 'n betoging by hul skool Dikobo Primêr.
– Volg Nuus24 op Twitter.
- SAPA
