Minderjarige om die beurt verkrag
2011-10-30 22:05
Johannesburg – ‘n Sewentienjarige meisie is om die beurt verkrag en verder aangerand deur ses mans in Taung, het die polisie in Noordwes Sondag gesê.
Volgens sers. Kelebogile Moiloa is ‘n 21-jarige man wat die meisie geken het Saterdag in hegtenis geneem ná die aanval, wat Vrydag omstreeks 14:30 in ‘n beboste gebied in die Dipitshing-afdeling gebeur het.
Sy het gesê die ses mans het ook probeer om haar keelaf te sny, maar dat sy slegs ‘n ligte besering opgedoen het.
Die meisie het alleen gestap toe sy deur die 21-jarige genader is, wat vir haar selfoon gevra het. Toe sy gesê het dat sy nie een het nie, het die man gesê sy moet enige geld wat sy het aan hom oorhandig.
“Die meisie het net aangehou stap,” het Moiloa gesê.
“Terwyl sy gestap het, het vyf mans haar van agter genader.”
Volgens die inligting wat ontvang is, het al vyf die mans haar met ‘n mes gedreig en haar klere met geweld uitgetrek voordat hulle haar verkrag het.
“Die man wat bekend aan haar was, het teruggegaan en haar [weer] herhaaldelik verkrag.”
Een van die mans het toe na bewering agter haar gestaan en haar keel met ‘n mes gesny. Hy het ook haar hande agter haar rug aan ‘n boom vasgemaak.
“Die meisie is hulpeloos en in pyn gelaat, totdat ‘n verbyganger haar gered het deur haar na die Taung-distrikshospitaal te neem vir mediese behandeling.”
Die voorval is by die polisie aangemeld en die meisie het hulle vertel van die man wat sy ken.
Hy sal na verwagting Maandag in die Taung-landdroshof verskyn.
Die ondersoek duur voort.
- Volg Nuus24 op Twitter
- SAPA