Miljoene vir gesondheid nie in Gauteng bestee
2012-10-23 15:15
Johannesburg – Die Gautengse departement van gesondheid het sowat 60% van sy teikens in die laaste finansiële jaar gemis, het die DA Dinsdag gesê.
Jack Bloom, DA-woordvoerder vir gesondheid in Gauteng, het gesê die departement se jaarverslag vir 2011/12 het bekendgemaak dat hy 117 van 210 teikens gemis het.
"Dit is 'n patetiese uitslag, maar geen verrassing vir die pasiënte wat swak behandeling by hospitale en klinieke in Gauteng ontvang nie," het hy in 'n verklaring gesê.
"Swak bestuur is die oorsaak, veral in gebiede waar die begroting nie ten volle benut word nie."
Die departement van gesondheid in Gauteng was nie onmiddellik beskikbaar vir kommentaar nie.
Bloom het gesê ambulanse het binne 15 minute reageer op 33% van prioriteit een-noodgevalle en nie op 65% soos wat in die teikens uiteengesit is nie.
Meer as R90 miljoen van die nooddienste se begroting van R788 miljoen is nie bestee nie.
Altesaam R217 miljoen van die begroting vir masjienerie en toerusting is nie bestee nie, terwyl R132 miljoen van die R722 miljoen, wat opsygesit is vir boukostes, nie gebruik is nie.
"Dit wys die ongelooflike onbevoegdheid wat uit die sukkelende departement geroei moet word," het Bloom gesê.
– Volg Nuus24 op Twitter
- SAPA
