Miljoene se skade ná trein brand
2011-08-25 13:03
Kaapstad – Skade van sowat R9,5 miljoen is aangerig en treindienste in Khayelitsha is vertraag ná drie treinkompartemente by die Nolungile-stasie aan die brand gesteek is, het Metrorail in Wes-Kaap gesê.
Twee van die drie kompartemente is heeltemal verwoes, het Lindelo Matya, streekbestuurder van Metrorail, in 'n verklaring gesê.
"Die brand is dalk opsetlik gestig. Pendelaars het gesien hoe drie mans uit die trein klim en na die informele nedersetting naby die stasie hardloop."
Matya het gesê die pendelaars kon nie daarin slaag om die mans te vang nie.
"Ons sal alles in ons mag doen om die polisie te help om die brandstigters aan te keer."
Die brand het omstreeks 04:30 uitgebreek. Pendelaars was toe reeds in die trein en is onmiddellik ontruim.
Niemand is beseer nie.
Busse is intussen beskikbaar gestel om pendelaars vanaf die stasie te vervoer.
– Volg Nuus24 op Twitter