Miljoene se skade in KZN
2012-12-12 07:07
Durban – Die plaaslike regering in KwaZulu-Natal het gesê die skade van die storms wat die provinsie teister, kan tot etlike miljoene rand styg.
Altesaam 13 mense is reeds dood en drie word vermis ná swaar reënbuie in die provinsie. Honderde mense is ook dakloos gelaat, het die SABC berig.
Nege hawelose mense is Dinsdag bevry nadat die Umbilo-rivier in Durban oorstroom het. Die mense het onder die M4 brug – wat oor die rivier strek – geslaap toe die vloedwater hulle vasgekeer het. Die brandweer, paramedici en die polisie is ingespan om hulle te red, het Netcare911 gesê.
Beamptes in Mpumalanga het bevestig dat reddingswerkers 14 lyke, insluitend dié van 'n tweejarige meisie, in 'n rivier in Ermelo gevind het, nadat 'n brug in die gebied meegegee het.
Dit volg nadat drie motors en 'n taxi in die rivier geval het, toe ‘n deel van die pad weggespoel.
'n Soektog na nog moontlike slagoffers word voortgesit, het Beeld berig.
– Lees hier meer.
– Volg Nuus24 op Twitter.
