Miljoene rol in vir Zuma se stigting

2010-10-02 13:49

Durban - Die sakeman en mynmagnaat Patrice Motsepe het aangekondig hy gaan R10 miljoen oor die volgende vyf jaar skenk aan die Jacob Zuma-stigting.

Motsepe het hierdie skenking Vrydagaand bekend gemaak tydens die stigting se fondsinsamelingsete in Durban by die Inkosi Albert Luthuli ICC.

Die bekende sakeman Vivian Reddy het Zuma se t-hemp vir R1 miljoen tydens 'n veiling by die ete gekoop.

Toyota Suid-Afrika het ook hulle steun getoon deur 'n blinknuwe Toyota Hilux 4x4 aan die stigting te skenk.

Zuma se stigting beoog om arm mense te help wat betref behuising, opvoeding en klere.

Volgens Motsepe het hy die geld geskenk omdat hy glo dis belangrik om sy rykdom met die armes te deel.

Reddy meen hy het die t-hemp gekoop omdat die president dit tydens die laaste verkiesingsveldtog gedra het, en dat hierdie verkiesings die politieke landskap van Suid-Afrika verander het.

Volgens die president het hy die stigting op die been gebring omdat daar sekere dinge is wat die Jacob Zuma Stigting vir Onderrig nie kan doen nie.

- Sapa

* Volg Nuus24 op Twitter.