Miljoene rande se boetes dalk geskraap
2009-08-21 12:34
Gloria Edwards
Johannesburg – Meer as R100 miljoen se boetekaartjies en dagvaardings wat ingevolge die Wet op Administratiewe Beregtiging van Padverkeersmisdrywe (Aarto) uitgereik is, gaan dalk gekanselleer word omdat dit onwettig uitgereik is.
Die nasionale forum van metropolisiehoofde (NCMPF) het Dinsdag aanbeveel dat die minister van vervoer Aarto nie landwyd implementeer voordat verskeie ernstige probleme wat nou daarmee ondervind word, opgelos is nie.
Dié probleme kan tot gevolg hê dat alle boetes en dagvaardings wat reeds ingevolge Aarto uitgereik is, gekanselleer sal word omdat die uitreiking daarvan die Wet op die Bevordering van Administratiewe Beregtiging (WBAB) oortree.
Luidens ’n verslag van die NCMPF aan minister Sibusiso Ndebele en die padverkeerbestuurskorporasie (RTMC), wat Beeld onder oë gehad het, sal landwye implementering van Aarto “katastrofiese” gevolge hê.
Dié verslag lys skokkende probleme met Aarto, onder meer eNaTIS se ondoeltreffende hantering van betalings, wederregtelike insameling van boeteskuld en verkeerde uitreikings van dagvaardings en boetes, wat tot miljoene rande se verliese lei. Dié probleme word reeds langer as ’n jaar in tegniese vergaderings bespreek “maar bly steeds onopgelos”.
Aarto is in September verlede jaar in die Tshwane- en in Februarie vanjaar in die Johannesburg-metroraadgebied as aanvoorprojekte geloods met die doel om onder meer die administrasie van oortredings te hanteer, te verseker dat motoriste die padverkeersreëls nakom en dat boetes betaal word.
Luidens die verslag het ’n ondoeltreffende Aarto egter sedert die implementering daarvan tot gevolg gehad dat slegs 14% van alle boetes betaal is en dat die uitreiking van boetes met tussen 30% en 50% gedaal het.
“Dit is moontlik dat dié probleem veroorsaak word deur die beperkings wat op spoedwetstoepassingsones geplaas is.
Weens ’n geregtelike oorsig kan spoedwetstoepassing net in 60-, 100-, en 120km/h-sones gedoen word. Wetstoepassing in 70-, 80-, 90- en 110km/h sones kan nie wettiglik gedoen word nie.”
Geen misdrywe onder Aarto kan regtens vervolg word nie. Dit is ook nie moontlik om dagvaardings aan oortreders uit te reik wat gekies het om hof toe te gaan nie.
“Ingevolge Aarto kan dronkbestuurders nie regtens gearresteer word mits hulle nie terselftertyd ’n verkeersoortreding begaan het nie.”
Volgens die NCMPF kan eNaTIS nie alle betalings hanteer nie. Aarto moet dus data-opnames met die hand doen, wat veroorsaak het dat duisende sulke opnames agterstallig is en verkeerd uitgereik word.
Die “korrupte” adresseringstelsel van eNaTIS het daartoe gelei dat 60% van alle oortredingskennisgewings teruggestuur word, wat tot R5 miljoen per maand verliese aan posgeld lei.
“Die poskantoor kan nie die volumes pos hanteer nie en voldoen nie aan die vereistes van Aarto nie.”
Luidens die verslag is die invordering van boetegeld vir plaaslike munisipaliteite “onmoontlik” omdat die betrokke partye verskeie wette wat munispale finansiële bestuur reël, oorskry.
Daar heers ook verwarring oor Aarto by die metropolisie, die polisie, die howe en die publiek.
“Nie een van die metropolisiedienste (landwyd) kan die ingewikkelde Aarto-projek, volumes en verwarrende wetgewing hanteer nie. Nasionale implementering moet eers ná 2010 geskied.”
Logan Maistry, Ndebele se woordvoerder, het gesê die minister “bekyk alle Aarto-kwessies”. “Ndebele sal die verslag vandag nagaan wanneer hy van Angola af terugkeer.”
– Beeld