Miljarde rande 'verdwyn' by Sassa
2010-10-13 08:10
Kaapstad - Maatskaplike toelaes van meer as R10 miljard wat deur die Suid-Afrikaanse Agentskap vir Maatskaplike Sekerheid (Sassa) geadministreer word, word vermis.
Dit het Dinsdag aan die lig gekom toe die ouditeur-generaal (OG) die departement van maatskaplike ontwikkeling se jaarverslag vir 2009-’10 bespreek het.
Die departement het ’n gekwalifiseerde ouditmening ontvang wat hoofsaaklik gewyt kan word aan die wanbestuur van geld deur Sassa.
Abrie Adendorff, ’n senior bestuurder in die kantoor van die OG, het Dinsdag aan LP’s gesê Sassa kan geen dokumentasie beskikbaar stel vir R10,6 miljard se toelaes wat uitbetaal is nie.
“Hierdie bedrae kan nie nagespeur word nie.”
Die departement weet dus nie aan wie dié toelaes uitbetaal is nie.
Die spesiale ondersoekeenheid is geruime tyd reeds besig om die omvang van korrupsie en bedrog met die toekenning van maatskaplike toelaes te ondersoek.
Adendorff het egter Dinsdag gesê munisipaliteite en die amptenare van private maatskappye moet ook ondersoek word omdat hulle glo onregmatig by maatskaplike toelaes kon baat.
Hy het voorgestel dat die hulp van die Suid-Afrikaanse Inkomstediens ingeroep word om dié ongerymdhede aan die kaak te stel.
Adendorff het ook daarop gewys dat daar niks skort met die departement van maatskaplike ontwikkeling se vertoning en die behaling van sy doelwitte nie.
“Die departement moes ongelukkig boet vir Sassa se sondes,” het hy bygevoeg.
Dit is te wyte aan Sassa dat die departement vanjaar ’n gekwalifiseerde ouditmening ontvang het, het Adendorff gesê.
- Die Burger