Mieliekrisis: ‘SA kan 30% van boere verloor’
2010-08-14 07:57
Bloemfontein – Suid-Afrika kan 30% van sy kommersiële boere voor Desember verloor as die mielieprys laag bly, het Neels Ferreira, voorsitter van Graan SA, gesê.
“Die ouens ly enorme verliese,” het hy gister gesê.
Hy het in Maart by alle landbou-ondernemings navraag gedoen oor wat die uitwerking van die mieliekrisis op die landbou kan wees.
Die slotsom is dat die land gemiddeld 30% van sy kommersiële boere kwyt kan wees.
Dit strook met dr. Pieter Mulder, adjunkminister van landbou, bosbou en visserye, se stelling vroeër die week dat 25 van die boere net by Schweizer-Reneke in Noordwes dalk nie die mieliekrisis gaan oorleef nie.
Ferreira het gesê die krisis het ook ’n uitwerking op die ekonomie van die inset-verskaffers.
Die hele ketting tussen boer en verbruiker word benadeel.
Herman Meiring, voorsitter van Bultfontein Landbou, het gesê nie net is die lae mielieprys ’n slag vir boere nie, maar hulle stroop in die omgewing 1 t / ha tot 1,5 t / ha minder as gewoonlik weens die swaar reën vroeër.
Slegs boere met bogemiddelde opbrengste kan ’n bietjie geld maak.
Graan SA se raad aan boere is om intussen aanplantings vir die nuwe seisoen “drasties af te skaal en eerder papiermielies te koop”.
Intussen probeer die organisasie uitvoer aanmoedig. Die uitvoerpoel is egter deur die regering in die kiem gesmoor.
- Beeld