Aftreefonds nie genoeg vir middelklas
2012-02-28 07:03
Kaapstad – Selfs met ’n verpligte nasionale aftreefonds sal die middelklas bykomend tot ’n fonds moet bydra om hul inkomste ná aftrede aan te vul.
Aftreefondse in die private sektor sal goedgekeur en geakkrediteer kan word daarvoor, het Selwyn Jehoma, adjunk-direkteur-generaal van die departement van maatskaplike ontwikkeling, gister op die konferensie van die vereniging vir pensioenfondsprokureurs gesê.
Al drie pilare van die bestaansveiligheidstelsel moet hervorm word. Die eerste pilaar is maatskaplike bystand, die tweede ’n verpligte fonds en die derde vrywillige versekering.
Daar moet gekyk word na die uitbreiding van maatskaplike toelaes. Die middeletoets gaan verwyder word omdat dit mense ontmoedig om te spaar.
Die tweede pilaar, ’n verpligte pensioenstelsel, moet ’n voorgeskrewevoordeel-komponent hê om op ’n basiese vlak aan mense ’n veilige inkomste te gee.
Die verpligte fonds sal ’n risiko-komponent moet hê sodat vir ongeskiktheid en dood voorsiening gemaak word. Die regering sal die fonds moet waarborg.
Jehoma het gesê daar is ook ’n argument dat dié wat ’n inkomste van meer as sowat R150 000 per jaar verdien, ’n kans gegee word om aan ’n voorgeskrewebydrae-fonds deel te neem.
Hy het aan die hand van ’n piramide-illustrasie verduidelik op die onderste vlak sal die staatsouderdomspensioen aan almal verskaf word, met die middeletoets wat verwyder is.
Op die tweede vlak is die voorgeskrewe-voordeelfonds waaraan alle Suid-Afrikaners sal kan deelneem en bydraes ook deur lede van die regeringspensioenfonds en ander soos Transnet gemaak moet word.
Die tesourie het berekeninge gedoen vir ’n bydrae-subsidie vir mense met ’n lae inkomste sodat die infasering van ’n bydraestelsel vir hulle meer bekostigbaar is.
Op die derde vlak, waar mense steeds verplig word om by te dra tot die fonds, gaan dié met ’n inkomste bo ’n sekere vlak aanvullende inkomste-verwante beskerming kry. Die debat is of dit verpligtend of na eie goeddunke moet wees.
Volgens Jehoma sal die verpligte nasionale pensioenfonds meebring dat mense met ’n baie lae inkomste ’n vervangingsverhouding van meer as 100% het met aftrede, maar dié met ’n groter inkomste sal ’n baie lae vervangingsinkomste hê. Byvoorbeeld, mense wat R76 000 per jaar verdien, sal ’n vervangingsverhouding van net 40% hê.
Hy het gesê die beleidsdokument gaan binnekort aan die kabinet voorgelê word en dan sal openbare konsultasie begin.
– Volg Nuus24 op
Twitter
- Die Burger
