Metropolisie vat kinders by ouers af
2010-08-13 17:05
Pretoria – Die dertienjarige Veronica* is een van vele straatkinders wat Vrydag van hul ouers weggeneem is wat op besige straathoeke in Pretoria sit en bedel.
Veronica se pa, John*, is vanaf Mosambiek afkomstig en bedel op die straathoek oorkant die Menlyn Park-winkelsentrum.
Hy was Vrydag stomgeslaan toe die metropolisie en beamptes van maatskaplike ontwikkeling onverwags sy dogter van hom afgeneem het.
Met rooi gehuilde oë het John vertel dat sy dogter nie saam met hom sal huis toe gaan nie, maar in ‘n veilige hawe gehou sal word.
Hierdie klopjag is deel van ‘n gesamentlike veldtog om bedelaars vas te vat wat hul kinders saam neem as hul op besige straathoeke vir geld vra.
Volgens Teddy Gomba,’n beampte van maatskaplike ontwikkeling, sal die ouers nie in hegtenis geneem word nie, maat sal hul ook nie hul kinders kan huis toe neem alvorens hul lewensomstandighede verbeter nie.
Gomba meen dat daar onlangs ‘n toename was in kinders wat gebruik word as “emosionele lokaas” om geld vanaf motoriste te verkry.
“Hierdie tipe voorvalle het onlangs toegeneem. Ons veldtog is daarop gemik om die regte van die kinders te beskerm,” het hy gesê.
Vroeër het ‘n vrou op haar knieë neergeval toe die metropolisie probeer het om haar baba vanaf haar rug te haal.
Die kind het verskrik gelyk en onophoudelik gehuil toe die metropolisie haar vanaf haar ma afgeneem het.
Enkele blokke verder is ‘n blinde vrou deur joernaliste en fotograwe omsingel toe die metropolisie haar 18-jarige, vyfjarige en kleuter vanaf haar weggeneem het.
Die vrou kon niks doen om hulle te keer nie.
*Skuilname
Volg Nuus24 op Twitter.
- SAPA