Metropolisie skiet kind dood
2009-09-09 07:45
Wolfram Zwecker
Johannesburg - Die Ekurhuleni-metropolisie het glo Sondagaand ’n kind van Delmore Park by Germiston doodgeskiet.
Inwoners van dié woonbuurt is woedend oor die beweerde voorval wat glo plaasgevind het tydens ’n partytjie om die lente te vier.
Die polisie het na bewering omstreeks 20:00 opgedaag om die partytjie stop te sit, vermoedelik omdat dit te raserig was.
Volgens hoofsupt. Wilfred Kgasa-go, woordvoerder van die Ekurhuleni-metropolisie, is metropolisielede Sondagaand na Delmore Park. Daar was ’n skietery en die metropolisie en die SAPD ondersoek die saak.
Donshael het Alexander Thys (15) in die maag getref. Hy het ná die noodlottige skoot nog ’n entjie gehardloop voordat hy in mekaargesak en gesterf het. Ethan Erasmus (16) wou nog help, maar was self gewond.
Christopher Bosch (16) en Shan Sebatie (16) is ook deur die donshael getref. Dié drie is na die Natalspruit-hospitaal geneem.
Die inwoners van Delmore Park beweer die kuiery was vreedsaam. Mnr. Wayne van Zyl, ’n gemeenskapsleier wat glo ook hardhandig deur die metrolede rondgepluk is en wie se kamera na bewering gebreek is toe hy foto’s wou neem, sê die partytjiegangers het reeds begin huis toe gaan toe die skietery gebeur het.
“Dit was ’n lentefees en die mense het gekuier. Daar was geen probleme nie. Teen 20:00 het die metropolisie opgedaag en my gevra om die mense te vra om huis toe te gaan omdat hulle raas. Hulle was besig om uitmekaar te gaan, maar kon nie ry nie omdat die metropolisie die strate afgesper het. Daar was egter geen probleme nie. Ek weet nie hoekom hulle moes skiet nie,” het Van Zyl gister gesê.
Volgens mev. Inez Strauss, een van die ma’s van die jongmense wat in die parkie was, het tussen agt en tien metropolisievoertuie Sondagaand verby haar huis na die parkie gery.
“Hulle het al die paaie toegemaak en afgesper; die mense in die parkie kon nie uitkom nie. Die seuns was besig om, soos hulle aangesê is om te doen, uit die parkie te loop toe een van die metropolisielede blykbaar geskree het: ‘Boesmans, ons gaan julle vrekmaak.’ Hulle het daarna geskiet,” het sy gister gesê.
Alexander se ma, Claudia, was gister nog te geskok om oor die voorval te praat. Sy pa, Willem, was gister besig met begrafnisreëlings. Die begrafnis sal na verwagting die naweek plaasvind.
’n Roudiens word Donderdagaand in die parkie gehou waar die skietery plaasgevind het. .
- Beeld