Metropolisie-beampte getuig in Jub Jub verhoor
2010-12-15 12:02
Johannesburg – ‘n Metropolisie-beampte het nie gediskrimineer tussen die musikant Molemo ‘Jub Jub’ Maarohanye en sy medepligtige Themba Tshabalala, toe hy hulle vir dwelm en alkoholmisbruik getoets het nie, het die Protea landdroshof Woensdag gehoor.
“Vir my is daar geen verskil tussen beskuldigde een (Maarohanye) en beskuldigde twee (Tshabalala) nie. Vir my is hulle dieselfde,” het konst. Gideon Maseko aan die hof gesê.
Hy het gereageer op ‘n verklaring deur Maarohanye se prokureur, Ike Motloung, wat voorgestel het dat Maseko ‘n dwelmtoets op Maarohanye gedoen het omdat hy ‘n welbekende musikant is.
Volgens Motloung moes Maarohanye meer as vyf keer in ‘n pypie blaas om sy alkoholvlak te toets.
Maar Maseko het dié bewerings ontken en gesê nie een van die beskuldigdes het hom enige probleme gegee nie.
Hy sê Maarohanye en Tshabalala se gebare en bewegings het hom laat vermoed dat hulle dwelms gebruik het.
Maseko het by tye nie Motloung se vrae beantwoord nie, en het liewer lang verduidelikings gegee.
Maseko is die tweede staatsgetuie in die getuiebank op die tweede dag van die verhoor.
Maarohanye en Tshabalala het onskuldig op die tien aanklagtes teen hulle gepleit.
Die twee staan tereg op vier aanklagte van moord met alternatiewe aanklagte van strafbare manslag, twee aanklagte van poging tot moord met ‘n alternatiewe klag van roekelose en nalatige bestuur, die gebruik van dwelms en bestuur onder die invloed van dwelms.
Hulle word tans verhoor nadat vier kinders in ‘n ongeluk op 8 Maart 2010 in Soweto doodgery is.
Andile Mtombeni (19), Phomelelo Masemelo (16), Mlungisi Cwayi en Prince Mahube, albei 17 is in die ongeluk dood.
Fumani Mushanana (17) en Frank Mlabo (180 het ernstige beserings opgedoen insluitend breinskade.
- Volg Nuus24 op Twitter.
- SAPA