Metro dok op ná kind se dood
2011-12-01 09:00
Port Elizabeth. – Meer as ses jaar nadat ’n egpaar van die stad hul dogtertjie aan ’n waterdood moes afstaan, het die Nelson Mandelabaai-metroraad en die polisie gister ’n skikking van R650 000 met hulle bereik.
Jolene Sampson het haar dogtertjie, Kayla (4), en ’n ongebore baba verloor toe hul voertuig op 3 Augustus 2006 deur vloedwater van ’n laagwaterbrug oor die Baakensrivier meegesleur is.
Sampson het gesê sy is dankbaar sy en haar familie is die trauma van ’n uitgerekte hooggeregshofsaak gespaar en dat die uitslag ’n oorwinning vir alle inwoners van die metro is.
“Dit gaan nie oor die geld nie. Al wat ons wou hê, was dat die foute van daardie verskriklike dag nooit weer herhaal moes word nie.
“En ek het my sin gekry: Vandag is daar groot waarskuwingsborde en kameras op om die brug te beveilig.”
Sampson en Kayla is dié oggend vroeg in gietende reën by hul huis in die woonbuurt Sherwood weg op pad na die kleuterskool waar sy steeds werk.
By die laagwaterbrug in Riverstoneweg het diep vloedwater hul BMW van die pad gelig en rivieraf gesleur. Ma en dogter is uit die voertuig geruk.
Sampson het ontkom deur aan ’n boom in die rivier vas te klou. Haar bekkenbeen en arm is gebreek en sy het dieselfde dag nog ’n miskraam gehad.
Ná ’n grootskaalse soektog van sewe uur is Kayla se lykie 400 m verder in die water gevind.
Sampson het gesê die gebeure het haar onherroeplik verander. “Ek het ’n verskriklike vrees om in die
reën te ry. As ek dit móét doen, huil ek van begin tot einde.”
Maar selfs erger as dit is die gemis aan Kayla. Vandat sy kon onthou, wou sy ’n dogtertjie gehad het
En die dag toe sy uitvind sy is swanger, het sy geweet dis ’n meisie en haar naam gaan Kayla wees.
“Ná al die jare wil ek steeds huil as ek pienk meisiekleertjies sien of as van my vriendinne dogtertjies kry. Dis ’n daaglikse stryd en dit druis in teen alles in die natuur dat ’n ouer sy kind moet begrawe.”
Ná Kayla se dood het die dokters geen hoop gehad dat Sampson en haar man, Charl, ooit weer kinders sou kon hê nie. Op 15 Augustus 2007 het hulle egter ’n seuntjie, Roché, gehad en vanjaar het Ruan (nou vier maande) gekom.
Die egpaar het gesê die liefde en gebede van hul familie, vriende en vreemdelinge het hulle deur die hel van hul verlies gedra.
Sylvia Biesenach van die regsfirma O’Brien Inc. het gesê die metro is gelas om die grootste deel van die skikkingsbedrag plus regskoste te betaal en die polisie die res.
– Volg Nuus24 op Twitter
- Die Burger