Menslike fout oorsaak van Oos-Londen-treinongeluk

2013-02-08 15:22

Johannesburg – 'n Menslike fout was die oorsaak van 'n treinongeluk in Oos-Londen waarin 29 mense beseer is, het Metrorail Vrydag gesê.

"'n Voorlopige ondersoek toon dat die ongeluk veroorsaak is deur 'n menslike fout aan die kant van die personeel wat verantwoordelik is vir treinbeheer," het Lawrence Venkile, woordvoerder, in 'n verklaring gesê.

"'n Transnet-beampte wat die treine beheer, het 'n trein by 'n platform ingelaat waar 'n stilstaande trein met passasiers gestaan het."

Altesaam 14 waens en twee lokomotiewe is Donderdag in die botsing by die Oos-Londen-treinstasie beskadig.

Transnet Freight Rail  is verantwoordelik vir die beweging van treine in die gebied.

"Treindienste is hervat en al die beseerde passasiers is gister [Donderdag] uit die hospitaal ontslaan. Niemand is kritiek beseer nie."

Die ondersoek duur voort.

– Volg Nuus24 op Twitter


 

- SAPA