Meisie 'verneder' toe sy verkeerde uniform dra
2012-02-22 12:10
Johannesburg – ‘n Tienjarige meisie wat ‘n broek in plaas van ‘n romp na ‘n Johannesburgse skool gedra het, moes na bewering uittrek en in haar broekie skoolgaan, lui ‘n berig.
The Star berig die leerling aan die Cosmo City Primary School No 1 moes haar broekie, ‘n skoolhemp en ‘n trui vir die res van die dag dra.
Die meisie is na bewering aangesê om uit te trek aangesien sy nie die korrekte uniform skool toe gedra het nie.
Volgens haar ma, wat nie genoem kan word nie om die meisie se identiteit te beskerm, het die graad 4-leerling haar lang, grys broek skool toe gedra in plaas van ‘n skoolromp, aangesien die romp nat was van die vorige dag se reën.
Die ma het aan die koerant gesê haar dogter is geforseer om sonder haar broek huis toe te gaan aangesien dit weggeraak het.
Kgomotso Khumalo, hoof van die skool, het die aantygings ontken.
Al wat sy gedoen het is om die leerling onder ‘n motorafdak tot 10:00 te laat staan, het sy gesê.
Khumalo het bygevoeg dat die meisie een van 70 leerlinge was wat Dinsdag die verkeerde skooluniform gedra het.
“Ek het vir hulle gesê ‘julle lyk soos ‘n sirkus’. Wat ek gewoonlik doen is om hulle te vra om onder die motorafdak tot 10:00 te staan... en dan gaan hulle terug klas toe. Dan oorhandig ek ‘n brief aan hulle vir hul ouers.”
Khumalo erken sy het Dinsdag geen briewe aan die leerlinge oorhandig nie.
Charles Phahlane, woordvoerder vir die Gautengse departement van onderwys, sê geen leerling moet by skool verneder word nie.
Hy het aan die koerant gesê die departement sal ondersoek instel.
Volg Nuus24 op Twitter
- SAPA