Meisie se moordenaar 30 jr. tronk toe
2010-07-23 09:28
Johannesburg - Die man wat Jeanine Kayser (11) van Cullinan vermoor en toe op haar begrafnis haar kis help dra het, is Donderdag in die hooggeregshof in Pretoria gevonnis tot effektief 30 jaar tronkstraf.
Calvin William Edwards van Atteridgeville het Donderdag vóór sy vonnisoplegging uit die getuiebank Jeanine se familie gevra om hom te vergewe sodat hy “beter kan voel”.
Hy het dikwels koponderstebo gesit en snuif.
Regter Peter Mabuse het Edwards, wat los konstruksiewerkies gedoen het, gevonnis tot 14 jaar tronkstraf omdat hy Jeanine verkrag het en 25 jaar tronkstraf weens moord.
Nege van die 14 jaar tronkstraf sal gelyklopend met die 25 jaar uitgedien word.
Edwards, wat skuld beken het, het Jeanine op 4 Oktober 2008 verkrag en vermoor.
Jeanine en haar sussie, Chantelle (toe 9), was dié aand in Jan Jafta, hul stiefpa, se sorg terwyl hul ma, Rozan Jafta, in die hospitaal was ná ’n operasie.
Edwards het by Jeanine se kamervenster ingeklim. Hy het haar deur die venster na buite getel en in die bosse gaan verkrag. Edwards het haar teruggeneem huis toe en haar buite die huis verwurg.
“Toe ek besef het sy is dood, het ek haar deur die venster op haar bed neergegooi,” het hy in sy pleitverduideliking gesê.
Hoewel hy onder die invloed van drank was, het hy geweet wat hy gedoen het, het hy gesê.
Edwards het Donderdag aan Jeanine se familie gesê: “As u my net kan vergewe, sal ek beter voel. Ek moet gestraf word.”
Mabuse het Donderdag gesê Edwards is ’n eerste oortreder. Sy skuldbekentenis is ’n teken van sy berou. Hy het ook in die openbaar verskoning gevra.
Mabuse het gesê Jeanine se ma het huilend in die hof by hom gepleit om ’n swaar vonnis vir Edwards.
Talle “ongelukkige dinge” het gebeur met Jeanine se familie. Omdat Edwards nie gouer met sy skuld na vore getree het nie, is die stiefpa verdink van die moord op sy stiefdogter. Die gemeenskap het gedreig om hom dood te maak.
Dít het hom en Jeanine se ma uitmekaargedryf.
Jeanine se ma het Donderdag in die hof getuig Edwards het Jeanine se kis help dra op die begrafnis. Sy was verbaas toe sy hoor hy is gearresteer.
- Beeld