Meisie leef ná spoegkobra se pik
2011-12-22 07:24
Pretoria – 'n Meisie van Lephalale (Ellisras) kan ’n deel van haar hand verloor nadat sy in haar bed deur ’n Mosambiekse spoegkobra gepik is.
Mikayla Robbertse (5) was Woensdagmiddag nog in die Netcare Montana-hospitaal se waakeenheid en haar toestand is bestendig.
“Ons het pas ingekruip toe ons ’n vreeslike gil hoor,” het haar ouma, Charmaine Robbertse, Woensdag vertel oor die voorval wat Maandagaand gebeur het.
“Haar pa (Bertus) was eerste by haar en het die slang gesien. Dit het haar op die handjie en elmboog gepik.
“Ek en haar oupa (ook Bertus) het dadelik met haar na die Lephalale-staatshospitaal gejaag, terwyl my seun die slang gaan soek het.
“Ons was so benoud in die motor, want sy het in ’n stadium in skok gegaan en haar lyfie het begin ruk.
“Ons het besef my seun moet uitvind watter soort slang dit was sodat die regte teengif gegee kon word.”
’n Buurman het gehelp om die slang uit te ken en Mikayla het die teengif gekry.
“Die diens in Lephalale was puik. Sy was binne minute op suurstof met ’n drup en die dokter was binne vier minute daar.”
Mikayla is die volgende dag na ’n private kliniek en daarna na Montana.
Sy was baie siek en haar niere het in ’n stadium byna ingegee.
Die familie behoort egter nie tot ’n siekefonds nie en het Donderdag gehoor sy sou na die Steve Biko- akademiese hospitaal oorgeplaas word. Dit sou hulle meer as R40 000 gekos het om haar in Montana te hou.
“Sy is nou buite gevaar en die dokters sê Steve Biko kan haar ook die nodige sorg gee.”
Mikayla kla nie oor pyn nie, maar wil huis toe gaan.
“Sy sê haar pa is haar held, want hy het die slang doodgemaak.”
Volgens me. Robbertse is daar van die weefsel in haar handjie wat kan doodgaan. Dit kan beteken dat sy ’n deel van haar hand kan verloor en operasies gaan nodig hê.
Me. Robbertse het gesê op die plaas is hulle gewoond daaraan om saans alles uit te skud vir slange en skerpioene.
“Ons is net so bly sy leef. Oor haar handjie sal ons ons later bekommer. Sy is ’n sterk kind wat nie maklik opgee nie,” het sy bygevoeg.
Volg Nuus24 op Twitter.
- Die Burger