Meisie gevind ná sy by winkelsentrum verdwyn
2011-06-27 08:07
Kaapstad - “Ek weet nie hoe om die Here genoeg te bedank nie. Dankie, liewe Here, dankie, dankie, dankie!”
Met trane wat oor haar wange gerol het, het Landy Christoffels (36) Saterdag beskryf hoe dankbaar sy is dat haar dogtertjie, Chanté (3), ongedeerd gevind is.
Die ontvoering van Chanté op 3 Junie uit die parkeerterrein by die Bellville Middestad-winkelsentrum, het groot opspraak gewek.
Haar ma en pa, Cedrick Julisen (54), werk as motorwagte buite die winkelsentrum.
Volgens ao. November Philander, ’n polisiewoordvoerder, het ’n onbekende vrou Chanté Saterdag voor 07:00 by Elizabeth-park afgelaai. Dit is ’n oop grasperkgebied reg langs Voortrekkerweg.
Chanté was kaalvoet en in dieselfde klere geklee as die dag waarop sy vermis geraak het.
“Mense wat Saterdagoggend op pad was werk toe het gesien hoe ’n kleuter verlate in Elizabeth-park gesit het. Hulle het die polisie in kennis gestel,” het Philander aan Die Burger gesê.
By die polisiekantoor is foto’s van Chanté met dié dogtertjie vergelyk. Haar ouers is ook ingebring, en hulle het haar toe geëien.
“Geen fisieke beserings is waargeneem nie. Sy is ook vir verdere mediese toetse geneem,” het Philander gesê.
Chanté het self aan die polisie gesê ’n vrou het haar Saterdagoggend by die parkie afgelaai. Sy was ook baie honger.
Haar ouers het laat Saterdagmiddag van die polisiekantoor na hul slaapplek teruggekeer toe Die Burger met hulle gesels het.
Christoffels het gesê sy het self haar dogtertjie gebad.
Melany Kuhn, woordvoerder van die department van maatskaplike ontwikkeling, het Sondag gesê Chanté is nog nie in haar ouers se sorg teruggeplaas nie.
Die meisie is volgens haar tans by ’n plek van veiligheid waar maatskaplike werkers en beraders nog met haar werk.
Kuhn het gesê die uiteindelike doelwit is om die meisie terug in haar ouers se sorg te plaas, maar omdat daar nog ’n ondersoek aan die gang is, kan dit nie onmiddellik gedoen word nie.
“Die departement wil met die proses wat gevolg word ook verseker dat alles wat gedoen word in die meisie se beste belang is,” het Kuhn bygevoeg.
Intussen het ’n bron na aan die ondersoek gesê Chanté het aan die polisie gesê dat sy by ’n man en ’n vrou – vermoedelik die vermeende ontvoerder, wat slegs as Straatloper bekend is – was.
Sy kon egter nie hul name vir die polisie gee nie.
Niemand is nog in verband met die voorval in hegtenis geneem nie.
– Volg Nuus24 op Twitter
- Die Burger