Meisie geopereer ná hond haar op strand byt
2012-01-13 08:47
Kaapstad – Die meisie wat Woensdag deur ’n hond op een van die stad se strande gebyt is, is Donderdag uit die hospitaal ontslaan.
Meeka Riley Lackay (2) is Woensdagmiddag deur ’n rottweiler op Clifton se hoofstrand aangeval terwyl sy en haar tante Liska October op die strand gespeel het. Die loslopende hond het haar van agter op die regterbeen en rug gebyt.
Meeka is kort ná die aanval na die Kaapstadse Mediclinic geneem waar sy in die hoësorgeenheid opgeneem is. Later die aand het sy – weens die aard van haar beserings – ’n noodoperasie ondergaan.
Sy het plastiese chirurgie op haar rug en been ondergaan en is Donderdagmiddag ontslaan, het ’n tante, May Carla Herman, gesê. Die operasie het goed afgeloop.
“Sy is piekfyn en baie gelukkig om terug by die huis te wees. Sy het vandag (Donderdag) probeer stap,” het Herman gesê.
“’n Mens kan sien sy het nog pyn, maar andersins doen sy goed. Sy wou nie die hospitaal se kos eet nie, maar ’n mens kon sien sy was baie honger.”
Meeka gaan vandag weer die plastiese chirurg sien, wat die familie oor ’n moontlike opvolgoperasie sal raadpleeg.
Die familie het vroeër die week aangedui hulle is voornemens om regstappe teen die hond se eienaar, James Smith, te doen.
Smith kon nie Donderdag vir kommentaar bereik word nie.
Neil Arendse, die stadsraad se assistent-hoof van spesiale wetstoepassing, het gesê op die meeste strande is daar kennisgewings wat aandui of honde-eienaars met hul troeteldiere daar mag stap of nie.
“Daar is ook duidelike kennisgewings oor watter tye hulle daar mag stap, indien dit op die strand toegelaat word.”
Clifton se hoofstrand is egter ’n strand waar dit nie toegelaat word nie, het hy gesê.
Hy het bygevoeg loslopende honde is veral ’n probleem in die Houtbaai-omgewing.
Geen honde word in die somerseisoen van 1 November tot 30 April tussen 09:00 en 18:00 op die stad se strande toegelaat nie.
“Daar is sekere strande waar dit toegelaat word dat honde los loop, soos by Mouillepunt se vuurtoring,” het hy gesê.
Wilfred Solomons-Johannes, woordvoerder van die stadsraad se rampbestuurafdeling, het gesê Smith is met R1 500 beboet omdat hy met sy hond op die strand geloop het.
Die hond is ook by hom afgeneem.
Volg Nuus24 op Twitter
- Die Burger