Meisie (5) versmoor onder strooibale
2011-09-08 07:07
Stellenbosch – ’n Vyfjarige meisie van Bredasdorp het Dinsdag vermoedelik versmoor nadat strooibale op haar geval het.
Margarete Uys wou die middag haar hoenders op haar pa, Cobus Uys, se plaas Patryskraal gaan versorg toe die strooibale op haar geval het.
Uys is die voorsitter van die Agri Mega-week, ’n jaarlikse landbouskou op Bredasdorp, se bedryfskomitee.
Leensie Streicher, woordvoerder van die skou, kon nie nadere besonderhede oor die voorval verskaf nie.
Luidens ’n verklaring het Uys en sy vrou, Heidi, vertel Margarete het vreeslik uitgesien na vanjaar se skou. Sy het ook ’n ooreenkoms met haar ouma gehad om saam met haar daarheen te gaan.
“Daagliks, die laaste paar weke, het sy haar pa gekonfronteer met: ‘Wanneer word die tente opgeslaan sodat die Agri Mega-week kan begin?’ ” lui die verklaring.
Orton King, uitvoerende direkteur van die Agri Mega-groep, het die ouers, familie en die toneel gister besoek.
“Ons het besluit om Agri Mega-week 2011 op te dra aan Margarete Uys vir haar toegewyde ondersteuning aan haar pa in sy bepaalde rol by die week en vir haar entoesiasme oor die week,” het King luidens die verklaring gesê.
“Mag Margarete se entoesiasme vir die plaaslewe ’n aansporing vir kinders en ouers wees om betrokke en bewus te raak van die landbou-omgewing.”
Die skou vind van 14 tot 16 September by Megapark op Bredasdorp plaas.
– Volg Nuus24 op Twitter
- Die Burger