Meisie (5) se toestand verswak ná kobra-pik
2011-12-23 09:40
Johannesburg – Die vyfjarige Mikayla Robbertse van Lephalale (Ellisras) wat vandeesweek deur ’n Mosambiekse spoegkobra gepik is, se toestand het skielik verswak.
Haar ouma, Charmaine, het Donderdag gesê haar lewer het vergroot en dokters is bekommerd oor haar niere.
Dit lyk boonop of die weefsel tot in haar borskas deur die slang se gif aangetas is.
“Die dokters het gesê as ons haar net kan deurtrek tot Sondag... ek het daarom maar al die kinders na Pretoria laat kom.”
Mikayla is intussen oorgeplaas van die Netcare-Montana-hospitaal na die Steve Biko-hospitaal in Pretoria, omdat haar gesin nie tot ’n siekefonds behoort nie.
Sy word nou in Steve Biko se waakeenheid behandel.
Die slang het haar Maandagaand in haar bed gepik.
Die Robbertse het haar dadelik na die Lephalale-staatshospitaal gebring waar sy teengif gekry het.
Sy is van daar na ’n private kliniek en toe na Pretoria.
“Hulle het van die begin af vir ons gesê haar toestand kan binne sekondes versleg. Haar lyfie is so klein, nou moet haar lewer hard werk om die gif en medisyne te hanteer.”
Volgens mev. Robbertse weeg Mikayla net 15 kg. Sy is glo baie swak.
Volgens prof. Graham Alexander, slangkenner aan die Universiteit van die Witwatersrand, beweeg die molekule in ’n Mosambiekse spoegkobra se gif baie vinnig deur weefsel.
Dit kan plekke van nekrose weg van die bytplek veroorsaak en in die heel ergste gevalle kan mense nog maande lank weefsel verloor.
Mev. Robbertse het gesê die dokters gaan nog eers wag voordat hulle dooie weefsel begin wegsny.
– Volg Nuus24 op Twitter
- Beeld