Meisie (5) reeds drie keer verkrag

2012-06-18 12:45

Johannesburg – ‘n Man het in ‘n hof verskyn nadat hy vermoedelik ‘n vyfjarige meisie in Limpopo verkrag het, het ‘n koerant berig.

The Star berig dit was die derde keer wat dié meisie sedert 2010 in Mmamatsha in die Ga-Molepo-gebied verkrag is.

Konst. Moses Molepo, ‘n polisiewoordvoerder, het aan The Star gesê die meisie se eerste verkragtingsaak is in Desember ingedien. Dié saak is na bewering tydelik teruggetrek hangende DNS-toetse en ‘n maatskaplike werker se verslag.

Die meisie is in Mei vanjaar na bewering weer verkrag. In dié saak is ‘n 28-jarige man op aanklag van verkragting aangekeer.

Die kind is verlede Woensdag vir ‘n derde keer verkrag. ‘n Man is in hegtenis geneem en het Vrydag in die Mankweng-landdroshof verskyn.

Sy is in die laaste twee voorvalle na bewering verkrag terwyl sy skool toe gestap het.

Die voorval in 2010 het plaasgevind toe sy in haar 13 jaar oue tannie se sorg geplaas is terwyl haar ouers ‘n begrafnis bygewoon het.

Volg Nuus24 op Twitter 

- SAPA