Meisie (12) verdrink glo weens swaar reën
2010-11-11 06:42
Volksblad
Botshabelo - Die ma van ’n 12-jarige meisie, wat in ’n rivier in vloed hier geval en vermoedelik verdrink het, het geen meer hoop dat haar kind lewend gevind sal word nie.
Cecilia Make het Woensdag op haar bed in hul huis in Botshabelo gelê en met tye hartstogtelik oor haar dogter Tebalo gehuil. “Ek verwag dat die polisie my kind se lyk gaan kry.”
Ao. Kallie Kaalsen en konst. Philip Lombard, albei van die polisie se duikeenheid in Bloemfontein, en ao. Fanie du Plessis van die Bethlehem-honde-eenheid met die hond Xander het Woensdag hard na die meisie gesoek.
Ander polisielede was ook op die toneel.
Die meisie is nog nie gevind nie en die soektog duur vandag voort.
Die meisie was Dinsdagmiddag ná skool saam met ander kinders op pad huis toe toe sy in die Kleinmodderrivier tussen T- en S-seksie geval het. Weens stormreën het dié rivier volgens konst. Consolation Mokoale, polisiewoordvoerder, baie vinnig gevloei.
Die ma het intussen bekommerd geraak oor moontlike vloede en gestap om haar kind te gaan haal. Sy het ’n seun raakgeloop wat by Tebalo was toe sy in die rivier geval het en hy het haar vertel wat gebeur het.
“Ek het niks krag nie,” het die ma gesê.
Volgens haar was Tebalo ’n gedissiplineerde en stil kind.
“Sy wou eendag ’n sanger word.”
Die meisie het ook daarvan gehou om te dans.
Die kind se pa, France, susters, Lerato (7), Mathapelo (17) en Nthabeleng (22), en broer, Molefi (19), is almal deur haar dood geruk.
Die ma moedig ouers en onderwysers aan om vir kinders te sê hulle moet nie alleen loop as dit reën nie.
- Volksblad