Meeste steun Mogoeng
2011-09-05 06:57
Kaapstad – Regter Mogoeng Mogoeng gaan waarskynlik Suid–Afrika se nuwe hoofregter word.
Op goeie gesag word verneem die meerderheid (16 teenoor 7) van die Regterlike Dienskommissie (RDK) se 23 lede het in ’n geheime stemming hul steun aan pres. Jacob Zuma se enigste kandidaat toegesê.
Hy is deur Zuma benoem om regter Sandile Ngcobo te vervang wat in Julie aangekondig het hy gaan nie – soos deur Zuma versoek – aanbly in die pos ná die verstryking van sy termyn nie.
Mogoeng is die afgelope naweek bykans tien uur lank in die openbaar ondervra waartydens RDK-lede hom oor die fel kritiek teen sy benoeming uitgevra het.
Hy het Saterdag in ’n stadium “geknak” en sy humeur verloor, maar het Sondag sterk steun van veral ANC-lede in die RDK gekry. Die meeste van die kommissarisse is ANC-kaders.
Die onderhoud het Sondagmiddag op ’n vurige noot geëindig toe Koos van der Merwe (IVP) Mogoeng versoek het om hom aan die proses te onttrek.
’n Onderonsie tussen Jeff Radebe, minister van justisie, en Van der Merwe het gevolg waarna adjunk-hoofregter Dikgang Moseneke, RDK-voorsitter, beslis het dié versoek is buite orde.
Mogoeng, ’n diep gelowige, het vroeër gesê hy het dit nooit oorweeg om hom te onttrek nie – deels omdat hy vertroue het in Zuma se “wysheid” om hom te benoem. Hy het oor die kwessie gebid. “Ek het ’n teken gekry dat dit die regte ding is. Ek dink God wil hê ek moet die hoofregter wees.”
Mogoeng is gevra of hy die regte temperament vir die pos het na aanleiding van ’n kort, vurige woordewisseling tussen Moseneke en Mogoeng. “Ek is nie God nie, ek is ’n mens,” was Mogoeng se verweer oor sy uitbarsting.
Van der Merwe het dit egter prontuit gestel Mogoeng is nie ’n geskikte kandidaat nie, omdat hy “geknak” het en nie sy humeur kan beteuel nie.
Mogoeng het vrae oor sy beweerde “patriargale ingesteldheid”, gebrekkige etiese waardes en “onsensitiwiteit” teenoor vroueregte en dié van minderhede driftig beantwoord en aangevoer ’n “verwronge beeld” van hom is die buitewêreld ingestuur.
“Dank die Here ek kon my saak stel. Noudat almal dit weet, kan ek sê: Moenie geskok wees nie, kalmeer en vat dit rustig. Dit (die besware) is nie so erg as wat dit lyk nie, julle het julle misgis,” het Mogoeng gesê toe adv. Hendrik Schmidt (DA) hom daaroor gepols het.
Volg Nuus24 op Twitter.
- Volksblad