Mees gesoekte man in Noordwes vasgetrek

2012-12-14 16:46

Johannesburg – 'n 20-jarige man is vir moord, verkragting en kaping in Zeerust vasgetrek, het die polisie in die Noordwes Vrydag gesê.

Lt. kol. Lesego Metsi het gesê die man is Donderdag in hegtenis geneem en was een van die drie mees gesoekte mans in die provinsie vir kaping, moorde, poging tot moord, ontvoering en verkragtings wat tussen November 2011 en Oktober vanjaar plaasgevind het.

Metsi het gesê sy twee makkers is op 20 November in hegtenis geneem.

Die modus operandi van die mans was dat hulle na bewering hul slagoffers – waarvan die meeste paartjies by afgeleë plekke was – se voertuie gekaap het. Hulle het dan glo die vroue verkrag en die paartjies vermoor.

"In sommige gevalle is die slagoffers deur hul aanvallers ontvoer en verkrag," het Metsi gesê.

Al die vermoorde slagoffers is geskiet.

Hy het gesê in die laaste voorval was 'n paartjie se voertuig gekaap, maar die kêrel kon daarin slaag om te ontsnap. Sy meisie was egter verkrag en vermoor.

Metsi het gesê die 20-jarige verdagte word glo ook verbind met ander verkragtingsake in die gebied.

"Die polisie sal DNS-ontleding doen om die bepaal of hulle met ander sake verbind word."
      
– Volg Nuus24 op Twitter

- SAPA