Meer as 5 skote op Kebble - na geweer 2 keer faal
2010-07-26 16:00
Johannesburg - Volgens Mikey Schultz, die man wat glo die sneller getrek het om die mynmagnaat Brett Kebble dood te maak, het sy poging om Kebble te skiet twee keer misluk.
“Ek het by die motorvenster uitgehang en die vuurwapen op hom gerig. Hy het net sy regterskouer ietwat gelig en reg voor hom gekyk. Ek het vir sy kop gemik en die sneller getrek.
“Die geweer het egter nie afgegaan nie,” het Schultz getuig.
Volgens hom het hy, Faizel Smith en Nigel McGurk toe weggery. Nadat Schultz die vuurwapen ondersoek het, het hul ‘n U-draai gemaak en teruggekeer na waar Kebble was.
“Ek het weer die vuurwapen op hom gerig en dit wou weer nie afgaan nie.”
Schultz glo toe vir Kebble gesê om vir hom te wag. Die drie verdagtes het weereens weggejaag en vir ‘n tweede keer omgedraai.
Met hul terugkeer was Kebble se motor egter nie waar hul hom gelaat het nie.
“Ons het ons motor gestop en gesien hoe Kebble reguit op ons afry. Ons het ons ligte vir hom geflikker. Hy het ‘n U-draai gemaak en reg langs ons gestop.
“Ek kon die teleurstelling in sy oë sien. Dit was duidelik dat hy dit net oor en verby wou kry.”
Weer het Schultz uit die venster gehang en vir Kebble se liggaam gemik.
“Die derde keer het die skoot afgegaan en ek het net aanhou vuur. Ek weet nie hoeveel keer nie, maar dit was meer as vyf keer,” het Schultz in die hof getuig.
Daarna het die drie verdagtes weggejaag.
Schultz het verder vertel dat hy na die skietery die vuurwapen met ‘n blaaslamp vernietig het.
Volg Nuus24 op Twitter.