Mediese bedryf wil dié wet vryspring
2011-07-13 08:57
Pretoria – As instellings in die mediese bedryf wil aansoek doen om vrystelling van die Wet op Verbruikersbeskerming, sal hulle moet bewys daar is bestaande wetgewing wat die publiek ewe goed beskerm teen swak diens of produkte.
Dit geld ook vir owerhede soos die Raad op Mediese Skemas (RMS) en Suid-Afrikaanse Medisynebeheerraad (MBR) wat glo die moontlikheid van sulke aansoeke bespreek.
Matthew Gibson van die regsfirma Edward Nathan Sonnenbergs, ’n kenner van die Wet op Verbruikersbeskerming, het vandeesmaand by die Raad op Gesondheidsorgfinansiers (RGF) se konferensie in Sun City gesê die RMS voer aan die Wet op Mediese Skemas beskerm reeds die publiek.
Daar is egter groot konflik tussen mediese skemas en die RMS juis omdat die wetgewing oor byvoorbeeld die dekking vir voorgeskrewe minimum voordele (VMV) verskillend geïnterpreteer word. Wanneer mediese rekeninge deur fondse afgekeur word, is dit dan juis verbruikers wat benadeel word. Die VMV-kwessie gaan in September in die hof uitgeklaar word.
Gibson het gesê selfs al word mediese fondse van die Wet op Verbruikersbeskerming onthef, sal hulle ’n paar veranderings moet maak om die publiek behoorlik te beskerm.
Na betroubaar verneem word, het die MBR ’n aansoek bespreek om geregistreerde medisyne, soos voorskrifmiddels, te onthef van die Wet op Verbruikersbeskerming.
Die MBR het nie voldoende regulasies ingestel om die publiek behoorlik te beskerm teen aanvullende en alternatiewe medisyne (AAM), soos kruiemedisyne, waaroor vals aansprake gemaak is of wat van swak gehalte is of besmet is nie.
Gibson het by die konferensie gewaarsku dat verskaffers van middels (soos AAM) wat nie deur die MBR goedgekeur is nie, ’n risiko loop.
Hy het aan Beeld gesê volgens die wet kan daar van almal wat betrokke is by die verspreiding van ’n produk verwag word om pa te staan vir die kwaliteit daarvan. ’n Winkel sal moet bewys hy is vrygestel van aanspreeklikheid as iets skeefloop en ’n verbruiker geskaad word.
Dit kan in teorie beteken dat groot apteekgroepe, wat ongetoetste of ongereguleerde kruiemiddels in hul voorwinkels verkoop, sal moet bontstaan indien so ’n middel onveilig is of met valse aansprake verkoop word.
Die MBR het verlede jaar belowe voorgestelde regulasies vir alternatiewe en aanvullende medisyne (insluitend kruieprodukte) word “binnekort” gepubliseer vir kommentaar, maar dit het nog nie gebeur nie.
– Volg Nuus24 op Twitter
- Beeld