Media span saam teen wet op inligting
2010-08-05 07:18
Die Burger
JOHANNESBURG. – ’n Aksiekomitee van joernaliste en redakteurs is Woensdag gestig om te keer dat die Wet op die Beskerming van Inligting, asook die voorgestelde mediatribunaal, ’n werklikheid word.
Die ANC het reeds in 2007 op sy Polokwane-konferensie ’n resolusie aanvaar dat so ’n tribunaal ondersoek en geskep word.
Die ANC se nasionale uitvoerende komitee het die mag om sy lede te enige tyd aan te sê om so ’n konsepwet aan die parlement voor te stel.
Die aksiekomitee wil daaroor met die ANC en sy alliansievennote in gesprek tree.
Ferial Haffajee, redakteur van City Press, en Tim du Plessis, redakteur van Beeld, is onder die komiteelede.
Raymond Louw van die Suid-Afrikaanse Nasionale Redakteursforum (Sanef) het Woensdag op ’n vergadering van mediawerkers gesê daar is die afgelope tyd ’n klimaat van verdrukking veral met die proses rondom sekere wetsontwerpe.
Hy meen optrede soos die inhegtenisneming van joernaliste, die dreigemente aan fotograwe en om hul foto’s uit te vee, asook om verslaggewers uit howe te gooi en die weiering van staatsdepartemente om inligting beskikbaar te stel, skets ’n donker prentjie.
Volgens Louw is daar sowat 12 wette uit die apartheidsera wat die regering die afgelope 15 jaar, ondanks verskeie versoeke deur Sanef, nie hersien, verander of geskrap het nie.
Haffajee meen verslae moet opgestel word om te kyk hoe die media oor die regering, die ANC en sy alliansievennote berig
“Gister op ’n vergadering met die ANC het ek gevind daar is ruimte om met die ANC te onderhandel... ek sal eerder samesprekinge as ’n openlike boikot ondersteun,” het sy gesê.
Talle mense in die bedryf meen ’n “aggressiewe veldtog” moet van stapel gestuur word om te waarsku teen die gevare van die voorgestelde wetgewing en hoe dit mediavryheid kan kelder.
Karima Brown, aangewese adjunkredakteur van die beplande The New Age, waarsku die media kan ’n klimaat skep waar hulle en die ANC verby mekaar praat.
“As jy nie die ANC nader nie, hoe anders gaan jy hulle kry om na jou te luister?” het sy teen ’n boikot gewaarsku.
“Die ANC is nie een homogene groep nie. As ons slim wil boks, behoort ons vennote binne die ANC, die regerende alliansie en burgerlike organisasies te kry. Cosatu, om maar een te noem, is ’n ondersteuner van die media.”
Die Gupta-groep, wat baie naby aan die ANC en pres. Jacob Zuma is, finansier The New Age.
Prof. Anton Harber, hoof van die Universiteit van die Witwatersrand se joernalistiekdepartement, het gewaarsku die media moet besef elke fout wat hulle nou maak, sal gebruik word om hulle mee te looi.
Mondli Makhanya, redakteur van die Avusa-groep se koerante, het Woensdag gesê Media24, Independent Newspapers en Avusa het in beginsel geld beskikbaar gestel om ’n veldtog te voer om mediavryheid te verseker.
- Die Burger