Media sal wél matriekuitslae publiseer
2011-10-13 08:07
Pretoria – Vanjaar se matrikulante se uitslae sal wél volgende jaar deur geakkrediteerde media-instansies bekend gemaak word.
Dít kom nadat groot verwarring Woensdag ontstaan het toe die departement van basiese onderwys aangevoer het die uitslae gaan nie meer beskikbaar gestel word nie omdat media-instansies nie voor die sperdatum van 30 September aansoek gedoen het om dit te publiseer nie. Net twee koerante het betyds aansoek gedoen.
Die departement het die datum vir aansoeke tot 26 Oktober uitgestel sodat instansies hulle van die norme en standaarde vir die publikasie van die uitslae kan vergewis.
Panyaza Lesufi, woordvoerder van die departement, het op ’n inligtingsessie in Pretoria gesê ’n gesprek oor die bekendmaking van die uitslae is nodig nadat die Jong Kommunisteliga (JKL) ook onlangs besware hieroor geopper het.
Die liga meen die bekendmaking van die uitslae het ’n negatiewe impak op leerlinge wat druip of nie hul name in die koerante sien nie. Gemeenskappe stigmatiseer ook dié kandidate en in sommige gevalle lei dit selfs tot selfmoord.
Lesufi het gesê daar is ook kommer en ontevredenheid oor media-instansies wat die uitslae voor die vasgestelde embargo-tyd bekend maak. Die voorlopige besluit is dat skole eers die uitslae op 5 Januarie kry, terwyl die media dit die volgende dag kan publiseer.
Die departement sal ook kyk na voorskrifte soos dat duidelik aangedui moet word waar kandidate kan aanklop indien hul name nie verskyn nie.
Nog ’n kwessie wat uitgeklaar moet word, is of kandidate se name of eksamennommers gebruik moet word.
Angie Motshekga, minister van basiese onderwys, sal nadat sy alle kommentaar oorweeg het, volgende week ’n finale aankondiging doen.
Volg Nuus24 op Twitter
- Volksblad