Media sak toe op hof voor Oscar-verskyning

2013-02-14 13:55

Pretoria – Plaaslike en internasionale nuusspanne het toegesak op die tronkhof by die Pretoriase Sentrale Gevangenis, waar Oscar Pistorius na verwagting sal verskyn.

Fotograwe en kameramanne staan ook voor die hof.

'n Landdros wat 'n ander saak aangehoor het, het aan 'n joernalis gesê hy "ontwrig" verrigtinge.

Die landdros het toe gesê hy is in kennis gestel dat die saak eers 14:00 aangehoor sal word. Joernaliste het toe opgepak en die hofsaal verlaat.

Joernaliste het ook buite die Pretoriase landdroshof gewag, omdat daar verwarring was oor waar Pistorius sal verskyn.

Die ster-atleet is Donderdagoggend in hegtenis geneem nadat hy sy vriendin, Reeva Steenkamp, in sy huis by die Silver Woods Golf Estate in Boschkop geskiet het.

Oscar se pa, Henke, het aan die SABC gesê sy seun is "baie hartseer" oor die skietery.
       
– Volg Nuus24 op Twitter

- SAPA