Media kla segsman van ANC-jeuliga aan
2010-03-17 11:41
Hlengiwe Mnguni
Kaapstad – Floyd Shivambu, die woordvoerder van die ANC-jeugliga het gesê verslaggewers wat hom daarvan beskuldig dat hy hulle gedreig het, is lafaards omdat hulle nie hul identiteite wil bekend maak nie.
"Wie is hulle?" het hy gevra toe hy vir kommentaar gevra is.
“As hulle nie wil uit kom nie en sê wie hulle is nie, is hulle dom.”
"Hoe weet ek julle lieg nie vir my nie,” het hy aan News24 gevra.
Shivambu het geweier om enige kommentaar te lewer oor of hy ooit verslaggewers gedreig het.
Eyewitness News het vroeër Woensdagmiddag berig dat die verslaggewers van Business Day, Independent Newspapers, The Mail & Guardian, The Times en Sunday Times, City Press, Media24 en e-News ’n amptelike klag teen die ANC-jeugliga se segsman ingedien het.
Dit kom nadat Shivambu hulle glo gedreig en gesê het hy gaan besonderhede oor hulle persoonlike lewens onthul.
Die jeugliga het onlangs met die koerant, City Press gebots nadat hulle die finansiële besonderhede oor die koerant se ondersoekende redakteur, Dumisani Lubisi, rondgestuur het.
Die jeugliga het beweer dat Lubisi bedrog gepleeg het en in geldwassery betrokke was.
Hulle het dus agterdog gekweek en het veronderstel dat Lubisi ‘n lekkerder lewe lei as wat hy kan bekostig.
Raymond Louw, die woordvoerder van die Suid-Afrikaanse Redakteursforum (Sanef) het aan News24 gesê hulle is “hewig gekant teen dié tipe dreigemente”.
“Dreigemente soos dit, sal net verdere spanning tussen die ANC-jeugliga en die media ontlok. Indien hulle ’n probleem met die joernalis het, moet hulle eerder na die redakteur of die polisie gaan,” het hy bygevoeg.
-News24