Media kan gestraf word oor dié inligting
2010-05-21 09:00
Kaapstad - Die media kan binnekort swaar gestraf word vir die besit en bekendmaking van geklassifiseerde staatsinligting.
Die Wetsontwerp op die Beskerming van Inligting maak dit nie net verpligtend om die besit van geklassifiseerde inligting aan die owerhede bekend te maak en dit terug te gee nie, maar plaas ook ’n onus op die howe om geklassifiseerde inligting wat in hofsake gebruik word, te beskerm.
Dr. Siyabonga Cwele, minister van staatsveiligheid, het onlangs op ’n inligtingsessie gesê die voorgenome wet sal egter ook ’n groot gros geheime staatsinligting deklassifiseer wanneer dit in werking tree.
Die nuwe wet sal ’n beperking van 20 jaar op geklassifiseerde inligting plaas en inligting wat dekades lank ontoeganklik was gevolglik vir die publiek oopstel. Dit sal ook die uitgediende Wet op die Beskerming van Inligting van 1982 herroep.
Cwele het vroeër vandeesmaand aan ’n parlementêre ad hoc-veelpartykomitee gesê die voorgenome wet het dit ook ten doel om geklassifiseerde staatsinligting beter te beskerm. Dit lys verskeie oortredings en stel minimum strawwe voor, waaronder:
Tussen 15 en 25 jaar tronkstraf vir diegene wat “hoogs geheime” staatsinligting bekend maak en tussen 10 en 15 jaar tronkstraf vir diegene wat “geheime” staatsinligting beskikbaar maak, versamel, bekom of bekend maak.
Van drie tot vyf jaar tronkstraf vir diegene wat “vertroulike” staatsinligting beskikbaar maak, versamel, bekom of bekend maak;
’n Boete of drie jaar tronkstraf vir die besit van geklassifiseerde staatsinligting en om dit nie aan die owerhede te rapporteer en terug te gee nie.
Luidens die wetsontwerp is die geheimhouding van sekere inligting noodsaaklik om onder meer “lewens te red, die vryheid en veiligheid van persone te beskerm, misdadigers te vervolg en nasionale veiligheid te beskerm”. Geheimhouding moet in “nasionale belang” wees en nié om onwettighede te verbloem nie.
Verskeie komiteelede meen die definisie van “nasionale belang” is te ruim.
Openbare sittings sal in Junie plaasvind.
- Die Burger