‘Medekerkgangers’ steel beursie
2010-08-16 08:20
Die Burger
Port Elizabeth - Die gewyde gees by ’n kerkdiens van die Oxygen Life-gemeente in Walmer, Port Elizabeth, is gisteroggend versteur toe ’n parmantige bende diewe hulle as besoekers voorgedoen het, ’n mede-kerkganger se beursie gegryp en laat spat het.
Oor Sondag se relletjie vertel past. Bradley Verrynne hoe ’n skoolvriend van sy vrou, ene Grant, gister die kerk besoek het.
“Ons het pas met lofprysing begin. Grant en sy vroutjie het lekker saamgesing en ingeskakel.
Terwyl almal besig was om litte los te maak en uit volle bors te sing, het nog drie onbekende besoekers hulself verby Grant gewurm en styf langs hom sitplek ingeneem.”
Verrynne was onbewus van die drie besoekers, ’n vrou en twee mans, wat hulle op blou stoele teen die muur tuisgemaak, alles fyn dopgehou het en meegedoen het aan die diens.
“Sowat tien minute nadat die diens begin het, het ek net gesien hoe vlieg mense op, hoe trek die stoele en hoe nael die vrou en twee mans soos weerlig hier uit, met Grant kort op hul hakke. ‘Hulle het my beursie!’ is ook al wat ek gehoor het.
“In daardie stadium het niemand geweet wat aan die gang is nie, maar ek kon sien hier is groot fout.
Kerkgangers was verstom en die diens is onderbreek.”
Verrynne vertel toe hy uiteindelik ook buite kom, het Grant ’n onbekende vrou styf in sy greep vasgehou terwyl die kerk se sekerheidswagte nadergestorm het.
Dit blyk dat een van die mans tydens die diens Grant se vrou se beursie uit haar handsak gegryp en laat spaander het. Die twee mans het met beursie en al in ’n wit Jetta oor die horison verdwyn.
Die vrou was nie so gelukkig nie. “Grant het haar omtrent onderstebo geduik en ’n goeie greep om haar lyf gekry, ” sê Verrynne voor gisteraand se aanddiens. “Ek is bly niemand is beseer nie.”
En dis nie die eerste keer dat daar ’n herrie by dié kerk is nie. ’n Ander kerkganger het bygevoeg dat daar in die verlede voorvalle was en dat hulle ’n tydjie terug wagte aangestel het om die jongspan op te pas.
Ao. Alwin Labans, ’n polisiewoordvoerder, het die voorval bevestig en gesê die vrou sal Maandag in die plaaslike landdroshof verskyn.
Volg Nuus24 op Twitter
- Die Burger