Mdluli dalk met nóg aanklagte verbind
2011-10-19 13:13
Johannesburg – Veelvuldige aanklagte van moord en ontvoering waarmee lt.genl. Richard Mdluli, geskorste misdaadintelligensiehoof van die polisie, verbind word, word ondersoek, berig The Times.
Die verdwyning van mense van Vosloorus wat meer as 13 jaar gelede misdaadintelligensie-informante was, is een van die sake wat ondersoek word.
Volgens die koerant is 'n seniorspan van die Valke gevra om Mdluli en een van sy medebeskuldigdes in die moordsaak kol. Nkosana Ximba, se betrokkenheid in die saak te ondersoek.
Oor die afgelope paar maande het ondersoekbeampte bewyse versamel, dossiere saamgestel en verklarings geneem van families van vermiste persone, slagoffers en polisiebeamptes wat saam met Mdluli en Ximba gewerk het toe hulle in Voslooris gestasioneer was.
Een van die sake wat ondersoek word, is dié van twee mans wat in 1998 by hul huise in Vosloorus vermis geraak het.
Lunga Khumalo (21) en Thulani Shoba (24) is laas deur familielede gesien toe Ximba hulle na bewering by hul huise in 'n polisievoertuig opgelaai het.
Mdluli en drie ander sal in April volgende jaar verhoor word op aanklagte van intimidasie, ontvoering, aanranding met die doel om ernstig te beseer, moord poging tot moord en sameswering om moord te pleeg.
Hulle word aangekla van die moord in 1999 op Oupa Ramogibe, wat glo Mdluli se mededinger in ’n liefdesdriehoek was.
Mdluli staar ook 'n aanklag van regsverydeling in die gesig.
– Volg Nuus24 op Twitter
- SAPA