McCord-hospitaal sluit nié
2013-01-31 07:07
Durban – 'n 103 jaar oue hospitaal in Durban sal nie gesluit word nie, het Sibongiseni Dhlomo, provinsiale minister van gesondheid, Woensdag aangekondig.
"Die raad en bestuur van die McCord-hospitaal het die departement van gesondheid se aanbod, dat hy die gesondheidsdienste sal oorneem, aanvaar," het Dhlomo gesê.
Die hospitaal se bestuur het twee weke gelede gesê hulle gaan die fasiliteit in Maart sluit, ná die provinsie se departement nie daarin kon slaag om die hospitaal in te lig of hy ‘n subsidie sal kry nie.
McCord het in 2011/12 ‘n subsidie van R70 miljoen ontvang.
Dr. Sibongile Zungu, hoof van KwaZulu-Natal se departement van gesondheid, het verlede week gesê ‘n besluit oor ‘n subsidie vir die hospitaal is nog nie gemaak nie.
McCord is een van die grootste hospitale in KwaZulu-Natal. Die fasiliteit bedryf ook die land se grootste MIV-sorg- en behandelingsprogram.
Dhlomo het gesê daar was verskeie besprekings tussen die departement van gesondheid en die bestuur van die McCord-hospitaal, om 'n gemeenskaplike oplossing te vind vir die probleme waardeur die hospitaal in die gesig gestaar word.
Hy het verder gesê daar is geen bewyse van finansiële wanbestuur by die hospitaal gevind nie.
– Volg Nuus24 op Twitter
- SAPA
