McBride was dalk nié dronk, hoor hof
2011-02-24 07:08
Pretoria – ’n Oud-departementshoof van die Universiteit van Pretoria se mediese skool het Woensdag in die Pretoriase streekhof getuig dat Robert McBride dalk nie onder die invloed van drank was toe hy in 2006 in ’n ongeluk was nie.
Prof. Anton Leonard van Gelder het getuig dat McBride se diabetes tesame met ’n hoofbesering moontlik die oorsaak kon wees dat hy “dronk” gelyk het op die aand van die ongeluk op 21 Desember 2006.
Dié oud-Ekurhuleni-metropolisiehoof se blou Chevrolet-ampsmotor het op die R511 naby Centurion omgeslaan toe hy op pad terug bestuur het van ’n werkpartytjie naby die Hartbeespoortdam.
Daar word beweer hy was ten tyde van die ongeluk onder die invloed van drank, maar hy ontken dit.
Volgens Van Gelder blyk dit dat dr. Inbanathan Sagathevan, McBride se vorige dokter, sy diabetes heeltemal verkeerd bestuur het en moontlik só die onveilige situasie geskep het wat moontlik die ernstige motorongeluk veroorsaak het.
Van Gelder het ook gesê dat McBride se gedeeltelike geheueverlies toegeskryf kan word aan ’n ligte kopbesering wat hy tydens die ongeluk opgedoen het.
“Dit kan ook ’n kombinasie van die lae bloedsuiker en die kopbesering wees wat veroorsaak het dat die beskuldigde voorgekom het asof hy onder die invloed van alkohol was die aand van die ongeluk,” het hy gesê.
Volgens Van Gelder was daar ook getuienis dat McBride op sy selfoon gepraat het.
“As ’n persoon soveel gedrink het dat dit sy spraak aantas, is dit moontlik dat sy motoriese funksies só sal wees dat hy nie in staat is om ’n selfoon te hanteer nie.
“Meeste van die getuies het sterk staatgemaak op die reuk van alkohol aan sy asem wat hulle laat glo het hy was onder die invloed van alkohol. Die meeste leke glo dat die reuk van alkohol maklik geïdentifiseer kan word.
“Die is egter ’n wanopvatting, want alkohol het nie werklik ’n reuk nie.”
Hy het verduidelik veral diabete met lae bloedsuiker se lewers gee chemikalieë af wat deur die bloedstroom in die longe beland en uitgeasem word.
Dié chemikalieë ruik soos “soet vrugte” as dit uitgeasem word en kan met die reuk van alkohol verwar word.
McBride word van dronkbestuur, bedrog en regsverydeling aangekla.
Adv. Petronel du Plessis sit haar kruisondervraging van Van Gelder Donderdag voort.
Volg Nuus24 op Twitter