McBride-saak wéér uitgestel
2010-03-23 14:25
Pretoria - Die dronkbestuurverhoor van die voormalige Ekurhuleni-metropolisiehoof Robert McBride is wéér in die Pretoria-landdroshof uitgestel.
Landdros Peet Johnson het die saak tot Woensdag uitgestel omdat die tweede assessor Jerry Phiri nie beskikbaar was en nie bereik kon word nie.
"Ons probeer hom sedert Vrydag sonder enige sukses opspoor," het Johnson gesê.
As Phiri Dinsdag opgespoor word, kan die verhoor voortgaan.
Patrick Johnson, Itumeleng Koko en Stanley Sagathevan, McBride se oud-kollegas, sou Dinsdag onder kruisverhoor geneem word.
Dié mans het eers verklarings gemaak dat McBride nie dronk was ten tyde van sy ongeluk in Desember 2006 nie, maar het later hul weergawes van die ongeluk verander en gesê hy was dronk.
Johnson het van die geleentheid gebruik gemaak om al die bewyse wat voor die hof geplaas gaan word, op rekord te stel.
"Al my notas is gesteel. Al die bewyse is gesteel so ek wil die saak regstel."
Talle beëdigde verklarings, verklarings, 56 foto's van die ongelukstoneel en die Kersparty wat McBride die dag van die ongeluk bygewoon het en die ongelukverslag het verdwyn.
McBride staan tereg op bedrog, regsverydeling en dronkbestuur.
– Sapa