Mbeki-klagtes nie MIV-oplossing
2009-11-24 11:24
Johannesburg – Onlangse oproepe dat die voormalige president Thabo Mbeki en die voormalige minister van gesondheid, Manto Tshabalala Msimang, aangekla moet word van volksmoord is nutteloos, het ‘n MIV/Vigs vereniging Dinsdag gesê.
“Ons moet al die beperkte hulpbronne en tyd wat ons het gebruik om MIV en vigs te beveg, eerder as om te fokus om teen mense en dinge wat in die verlede gebeur het te veg,” het Nkululeko Nxesi, sekretaris-generaal van die Nasionale Vereniging van MIV-positiewe Mense (Napwa), in ‘n verklaring gesê.
Die vereniging het gereageer op oproepe deur die Jong Kommuniste Liga dat Mbeki aangekla moet word oor die wyse waarop hy die MIV/Vigs kwessie hanteer het gedurende sy termyn.
“Dit is belangrik dat ons vorentoe beweeg en ophou om wraaksugtig te wees.”
Volgens Nxesi dra Tshabalala-Msimang se verklarings oor voeding gewig.
“Baie [mense met HIV/Vigs] het steeds nie toegang tot voedsel en voedsel-sekuriteit nie. Dit veroorsaak dat baie van hulle nie die medikasie gebruik wat deur die regering se klinieke en hospitale voorsien word nie.”
Mosiuoa Lekota, die president van Cope, het Maandag gesê dat die vraag dat klagtes vir volksmoord gelê word onverantwoordelik is.
Volksmoord is ‘n opsetlike besluit of beleid om mense dood te maak, het hy gesê. Geen so ‘n besluit is deur die ANC of die kabinet gemaak nie.
Lekota se verklaring kom ‘n week nadat Julius Malema gesê het dat die ANC-jeugliga nie sal toelaat dat Mbeki vir volksmoord aangekla word nie.
- Sapa