'Mbeki het gehuil voor bedanking' – WikiLeaks
2011-09-05 09:15
Johannesburg – ‘n Geheime Amerikaanse dokument op WikiLeaks beskryf hoe oudpres. Thabo Mbeki gehuil het voordat hy sy bedanking aangekondig het, het The Times Maandag berig.
Die dokument, gedateer 5 September 2008, beskryf ‘n vergadering tussen Vusi Gumede (adjunk-direkteur-generaal van beleidskoördinasie vir die presidensie), die analiste Thabileng Mothabi en Queeneth Mlaba en Amerikaanse amptenare.
In die dokument vertel Gumede dat Mbeki sy kabinet, adjunk-minister en personeel in trane bedank het.
Volgens die dokument verwys Mothabi na die huidige adjunk-president, Kgalema Motlanthe, as “dom” en pres. Jacob Zuma as ‘n “idioot.”
“Zuma is ‘n idioot... Ek bedoel regtig, regtig dom oor hoe beleid geïmplementeer word.”
Mothabi het ook glo gesê dat Zuma sal glimlag wanneer iemand hom ‘n vraag vra en dan na Gwede Mantashe, sekretaris-generaal van die ANC, leun om die antwoord te hoor.
Mothabi het Manto Tshabalala-Msimang, voormalige minister van gesondheid, as “baie slim” maar onstuimig beskryf.
Gumede en Mothabi het intussen uit die presidensie getree.
Die presidensie wou nie kommentaar lewer nie, maar noem die vrygestelde dokumente “gerugte en skindernuus.”
Volg Nuus24 op Twitter.
- SAPA