Mbeki: Muilband-plan weerspieël korrupsie
2010-08-27 08:43
Bloemfontein. – Die voorgestelde Wetsontwerp op die Beskerming van Inligting en die ANC se beoogde mediatribunaal stem vir hom ooreen met die toename in korrupsie in regeringskringe.
Só het Moeletsi Mbeki, sakeman, ontleder en broer van oudpres. Thabo Mbeki, gister by die Universiteit van die Vrystaat (UV) gesê.
Mbeki het studente toegespreek oor sy standpunt teen die Afrika-kapitalistiese projek soos vervat word in sy boek Architects of Poverty.
Hy het gesê deursigtigheid in die regering is uiters belangrik en die regering se plan om die media te muilband, is juis ’n weerspieëling van toenemende korrupsie.
“Die media, veral die gedrukte media, speel ’n groot rol in die openbaarmaking van korrupsie.”
Hy het verwys na die ontbinding van die Skerpioene (die direktoraat vir spesiale ondersoeke) en gesê die ontbinding is juis omdat hulle pres. Jacob Zuma van korrupsie aangekla het.
Mbeki het sowat drie weke gelede ’n vergadering met Cosatu se hoofsekretaris, Zwelinzima Vavi, gehad.
“Vavi moet nou vier lyfwagte hê omdat hy gesê het Suid-Afrikaanse ministers moet geoudit word. Nou word hy met die dood gedreig.”
Oor Suid-Afrika se ekonomie skets Mbeki ’n donker prentjie wat hy met kommerwekkende statistieke ondersteun het.
“Ons is besig om van ons ekonomie te verbruik in plaas daarvan om in ons ekonomie te belê.”
Luidens onlangse navorsing van die Universiteit van Kaapstad is 63% tot 75% van die swartes in die land werkloos.
Nog 14 miljoen mense lewe van maatskaplike toelaes.
Dit wat in die naam van “swart ekonomiese bemagtiging” gepleeg word, is presies dit wat Afrika verarm het, het hy gesê.
Die land het beweeg van een wat ekonomies groei tot een wat onderontwikkeling aanhelp, het Mbeki gesê.
“En Julius Malema het nie eens sy houtwerk deurgekom nie, nou wil hy die mynbedryf nasionaliseer.”
Hy sê Suid-Afrika se ekonomiese beleid is die slegste beleid ter wêreld wat die land in die verkeerde rigting bestuur.
Geen entrepreneurskap word in die land ontwikkel nie.
Die studente het aan Mbeki se lippe gehang en die uur lange praatjie is verleng.
Hy het gesê hy sou graag in die Reitz-kamerwonings wou slaap.
Mbeki werk reeds aan sy volgende boek, oor verskeie oplossings vir Suid-Afrika se voortslepende probleme.
Hy maak gebruik van verskeie medeskrywers,insluitend die rektor van die UV, prof. Jonathan Jansen.
- Beeld