Mbalula-uitlatings beledigend, sê ANC
2012-10-22 17:56
Johannesburg – Fikile Mbalula, minister van sport, se uitlatings dat hy geen tyd het vir pres. Jacob Zuma nie, is beledigend en oneerbieding, het die ANC-provinsies Maandag gesê.
Die ANC in die Oos-Kaap en KwaZulu-Natal het gesê Mbalula het die party ondermyn deur sy uitlatings in die media te maak.
"Die geneigdheid om dit te doen, ondermyn nie net die leierskap van die organisasie nie, maar is teenstrydig met die beginsels wat die politieke lewe van die ANC definieer," het die ANC in KwaZulu-Natal gesê.
Die ANC in die Oos-Kaap het saamgestem en gesê sy uitlatings veroorsaak dat hy as 'n oneerbiedige jong man, kamerade en kabinetsminister gesien word.
Albei provinsies het verwys na 'n berig in The Star waarin Mbalula gesê het hy het "geen tyd" vir Zuma nie, en het pogings van Zuma-lojaliste om hom te "neutraliseer", verwerp.
"Hulle het na my toe gekom en my 'n posisie aangebied om my te neutraliseer," het hy volgens die dagblad gesê.
Mbalula sê hy is die pos as die ANC se adjunk-sekretaris in die nasionale uitvoerende komitee aangebied indien hy sou instem om nie meer Zuma se mededingers by die ANC se verkiesingskonferensie in Mangaung in Desember te ondersteun nie.
"Hulle besef hulle kan nie polities oorleef nie. Hulle oorleef net op grond van korrupsie," het Mbalula gesê.
Hy het berigte dat hy twee weke gelede by Luthuli-huis ingestem het om Zuma te ondersteun, ontken.
"Ek het geen tyd vir Zuma nie. Hy het sy eie probleme geskep. Hy trou elke week."
Die ANC in KwaZulu-Natal het gesê Mbalula moet sy stellings terugtrek.
"Indien hy nie die stellings terugtrek nie, sal ons voorstel dat hy as lid van die nasionale uitvoerende komitee en minister van sport bedank."
Mac Maharaj, presidensiële woordvoerder, het Maandag versoeke om kommentaar na die ANC verwys.
Keith Khoza, nasionale woordvoerder van die ANC, het gesê dit is moeilik om kommentaar te lewer, omdat hy nog nie met die president of Mbalula gepraat het nie.
– Volg Nuus24 op Twitter
- SAPA
