Mazibuko het oog op parlementêre leierskap
2011-09-27 16:57
Kaapstad – Die nasionale woordvoerder van die Demokratiese Alliansie, Lindiwe Mazibuko, het Dinsdag aangekondig sy sal haar beskikbaar stel vir die pos van parlementêre leier van dié party.
“Ek is baie bly om formeel aan te kondig dat ek besluit het om te staan as kandidaat vir die pos van parlementêre leier in die mid-termyn leierskapverkiesings van die koukus,” het sy aan verslaggewers in Kaapstad gesê.
Die pos word op die oomblik deur die DA-LP en leier van die DA in die Oos-Kaap, Athol Trollip, beklee.
Mazibuko se skuif volg op onlangse nuusberigte dat sy invloed probeer werf by lede van die DA se koukus van 77 lede vir hul ondersteuning. Die verkiesing sal op 27 Oktober plaasvind.
Sy het in reaksie op vrae ná haar aankondiging gesê sy glo haar ouderdom is ‘n bate. Sy het in April 31 geword. Twee derdes van Suid-Afrikaners is onder 35, het sy gesê, en dit sal ‘n bepalende faktor in die 2014-verkiesings wees.
“Ek beplan om my jeug as ‘n sterk punt te gebruik.”
Mazibuko het gesê sy het Sondag aan Trollip gesê sy is van voorneme om haarself as ‘n kandidaat vir die leierskap van die parlementêre leierskap beskikbaar te stel. Sy reaksie was “baie hartlik”.
Trollip (47) sal homself vir herverkiesing beskikbaar stel.
“Ek stel myself beskikbaar om aan te hou om die koukusleier te wees en ek is baie bly dat Lindiwe [Mazibuko] gaan meeding om die pos,” het hy Dinsdag aan ‘n radiostasie gesê.
Mazibuko is by Dinsdag se nuuskonferensie vergesel deur Wilmot James en Watty Watson. Sy het gesê James sal homself verkiesbaar stel vir die voorsitterskap van die party se parlementêre koukus en Watson vir die pos van DA-hoofsweep.
“As ‘n span verteenwoordig die drie van ons dit wat die beste van die DA is: ‘n kombinasie van ervaring, vernuf en ‘n helder nuwe visie vir die toekoms.”
Tyd is egter nie aan hulle kant nie.
“Die uitdagings wat Suid-Afrika in die gesig staar, is enorm. Miljoene... is werkloos, misdaad het Suid-Afrikaners met ‘n gevoel van onveiligheid gelaat... en families is honger en sonder behuising,” het Mazibuko gesê.
“Ons wil hierdie kwessies voor en in die middelpunt van die parlement se politieke agenda plaas.”
- Volg Nuus24 op Twitter
- SAPA